12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
«Այնպես չէ, որ անպայման պետք է էլեկտրիկ լինես, կառավարիչ է պետք»․ Սարիկ Մինասյանը նշանակվել է ՀԷՑ-ի «Ղարս» մասնաճյուղի տնօրեն
Քաղաքականություն
01.08.2025 | 17:45
Գյումրիի ավագանու ՔՊ խմբակցության ղեկավար Սարիկ Մինասյանը նշանակվել է «Հայաստանի էլեկտրական ցանցեր» ընկերության Գյումրիի «Ղարս» մասնաճյուղի տնօրեն։ Տեղեկությունը Factor.am-ի հետ զրույցում հաստատեց Մինասյանը։ «Առաջարկը ստացա, քանի որ պետք է Գյումրիում մնամ, մանդատս կարող եմ պահել, ընդունեցի»,-ասաց նա։
Հիշեցնենք՝ մի քանի օր առաջ մամուլը գրեց, որ Մինասյանը, հնարավոր է՝ նշանակվի Աշխատանքի և սոցիալական հարցերի նախարար։ Նա հերքել էր այս տեղեկությունը՝ նշելով, որ չի ընդունելու որևէ առաջարկ, որը կխոչընդոտի ավագանու անդամի մանդատին։
Սարիկ Մինասյանը նախկինում զբաղեցրել է Միասնական սոցիալական ծառայության Գյումրու տարածքային կենտրոնի տնօրենի պաշտոնը։ Այսօր հետաքրքրվեցինք՝ իր ոլորտն առավել շատ սոցալականն է, ինչպես է ղեկավարելու էներգետիկ բլոկը։ «Կառավարիչ է պետք, այնպես չէ, որ անպայման պետք է էլեկտրիկ լինես։ Խնդիրները, ինչպես ՀՀ մյուս քաղաքացիներին, ինձ էլ ծանոթ են»,-ասաց Մինասյանը։
Նա տեղեկացրեց, որ երկուշաբթի օրվանից արդեն աշխատանքի կանցնի, այսօր արդեն հանդիպել է աշխատակազմին։ Մինասյանը պատրաստվում է նաև կադրային փոփոխություններ անել՝ շեշտելով, որ բարեխիղճ և պրոֆեսիոնալ մասնագետները շարունակելու են աշխատել։
Նարեկ Կիրակոսյան
