Ջենիֆեր Լոպեսը Հայաստանում համերգով հանդես է գալու Սնուփ Դոգի փոխարեն

Ջենիֆեր Լոպեսը Հայաստանում համերգով հանդես կգա Սնուփ Դոգի փոխարեն։ Կառավարությունն այսօրվա նիստում չզեկուցվող հարցերի շարքում հաստատել է «Համաշխարհային աստղի հայաստանյան հյուրախաղեր» նախագծում «Snoop Dogg» բառերը «Ջենիֆեր Լոպես» բառերով փոխարինելու որոշումը։

Նախագծի հիմնավորման մեջ գրված է, որ Սնուփ Դոգի համերգի չեղարկումը պայմանավորված է եղել 2023 թվականի սեպտեմբեր ամսին Լեռնային Ղարաբաղում ստեղծված իրավիճակով, ինչպես նաև Հայաստանի Հանրապետություն բռնի տեղահանված հայրենակիցների բարոյահոգեբանական վիճակով։

Նշվում է, որ ՀՀ ԿԳՄՍ նախարարության կողմից Ծրագիրն իրականացնող «Դոպինգ Սփեյս» կազմակերպության հետ հետևողական քննարկումների արդյունքում, վերջինս ներկայացրել է «Համաշխարհային աստղի հայաստանյան հյուրախաղեր» երաժշտական նախագծի իրականացման նոր ժամկետները և նոր աստղի անունը:

Սնուփ Դոգի համերգի համար Կառավարությունը 2023 թվականին «Դոպինգ Սփեյս» ընկերությանը հատկացրել է ավելի քան 2,3 մլրդ դրամ։ Ջենիֆեր Լոպեսի համերգի համար ընկերությանը հավելյալ ֆինանսավորում չի տրամադրվելու։

Լոպեսի համերգը նախատեսվում է օգոստոսի 3-ին՝ Վազգեն Սարգսյանի անվան «Հանրա­պետական» մարզադաշտում։

Ըստ նախագծի՝ միջոցառման ավարտից հետո, պետական մարմնի և կազմակերպության ﬕջև կնքված պայմանագրի պայմաններին համապատասխան, կազմակերպությունը պարտավոր է 60 օրվա ընթացքում պետական մարմին ներկայացնել պայմանագրի կատարմանը վերաբերող ֆինանսական (հատկացված դրամական միջոցների ծախսերի մասով) և բովանդակային (արդյունքային ցուցանիշներ. մասնակիցների քանակ, լուսանկարներ, ազդագրեր, մամուլի հրապարակումներ և այլ տեղեկատվական նյութեր) հաշվետվություններ։

Ըստ նախագծի հիմնավորման՝ այն բխում է «Հայաստանի Հանրապետության մշակույթի պահպանության, զարգացման և հանրահռչակման 2023-2027 թվականների ռազմավարության» 4-րդ գլխավոր նպատակի 4.2 կետից, այն է՝ «Հայաստանի ճանաչելիության բարձրացում» և 4-րդ գերակայությունից, այն է՝ Հայաստանի դիրքավորումը որպես համաշխարհային քաղաքակր­թական արժեքների կրող և ստեղծող երկիր, որն իր հերթին կնպաստի մշակութային զբոսաշրջության զարգացմանն ու ընդլայնմանը: