12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Լեռնային Ղարաբաղից տեղահանված քաղաքացու սոցիալական աջակցության հարցը լուծվել է․ ՄԻՊ
Հասարակություն
30.07.2025 | 12:32
ՀՀ մարդու իրավունքների պաշտպանի աջակցությամբ լուծում է ստացել Լեռնային Ղարաբաղից տեղահանված անձի սոցիալական աջակցություն ստանալու հարցը։ Այս մասին տեղեկացնում են ՄԻՊ գրասենյակից։
Նշվում է, որ քաղաքացին դիմել էր Պաշտպանին՝ տեղեկացնելով, որ իր ընտանիքի անդամները ներկայացրել են համապատասխան դիմումներ ՀՀ աշխատանքի և սոցիալական հարցերի նախարարության Միասնական սոցիալական ծառայություն՝ տեղահանվածների համար նախատեսված սոցիալական աջակցության ծրագրից օգտվելու նպատակով։
«Ըստ դիմողի՝ ընտանիքի որոշ անդամների դիմումները բավարարվել են, իսկ իր և երկու անչափահաս երեխաների դիմումները մերժվել էին։ Պաշտպանի աշխատակազմը պարզաբանումներ է պահանջել պետական իրավասու մարմնից, կատարվել են լրացուցիչ ուսումնասիրություններ։
Պարզաբանման համաձայն՝ Օպերատիվ շտաբի տրամադրած 2023 թվականի սեպտեմբերի 19-ի դրությամբ ՀՀ-ում գտնվող Լեռնային Ղարաբաղի բնակիչ հանդիսացող անձանց ցուցակներում քաղաքացու տվյալները սխալ են մուտքագրված, ինչն էլ անձի նույնականացման և վճարման ցուցակ ներառելու գործընթացը տեխնիկապես դարձնում է անհնար:
Պաշտպանի աջակցությամբ, քաղաքացու կողմից հավաքագրվել են լրացուցիչ փաստաթղթեր և ներկայացվել ՀՀ աշխատանքի և սոցիալական հարցերի նախարարություն։ Հաջորդիվ, Պաշտպանի հաստատության խորհրդատվության արդյունքում անձը դիմել է նոտարական գրասենյակ և ստացել փաստաթղթի պատկանելության իրավաբանական նշանակություն ունեցող փաստը հաստատելու մասին որոշում, որը Պաշտպանի աշխատակազմի աջակցությամբ կրկին ներկայացվել է Նախարարություն և համագործակցության արդյունքում հնարավոր է եղել լուծել խնդիրը՝ դիմողի տվյալները ներառել վճարման ցուցակներում:
Արդյունքում, 2025 թվականի հունիսի 30-ին քաղաքացին ՄԻՊ աշխատակազմին ուղղված լրացուցիչ դիմումով տեղեկացրել է, որ ամբողջ վճարումը ստացել է՝ ներառյալ է նաև նախորդ ամիսներին չտրամադրված գումարները։
Հարկ ենք համարում ընդգծել, որ Մարդու իրավունքների պաշտպանը ևս մեկ անգամ վերահաստատում է իր պատրաստակամությունը լիազորությունների շրջանակում աջակցել Լեռնային Ղարաբաղից բռնի տեղահանված անձանց իրավունքների պաշտպանությանը»,- նշված է հաղորդագրության մեջ։
