05.10.2026 | 21:14
Վարչապետը հյուրընկալել է մի խումբ ուսուցիչների և շնորհավորել մասնագիտական օրվա առթիվ
Համագործակցության հուշագիր՝ միտված պատմամշակութային ժառանգության հանրահռչակմանը
Հասարակություն
29.07.2025 | 14:15
ՀՀ կրթության, գիտության, մշակույթի և սպորտի նախարարության, «Հայաստանի էնոտուրիզմի խորհուրդ» հասարակական կազմակերպության և «Արենի-1 քարայր» գիտահետազոտական հիմնադրամի միջև ստորագրվել է համագործակցության հուշագիր։ Այս մասին տեղեկացնում է ՀՀ կրթության, գիտության, մշակույթի և սպորտի նախարարությունը։
Համագործակցության նպատակը Վայոց ձորի մարզի «Արենի-1 քարայրը և հարակից գինեգործական լանդշաֆտը» հայտի մշակումն ու ՅՈՒՆԵՍԿՕ-ի համաշխարհային ժառանգության նախնական ցանկում ընդգրկումն է:
«Հուշագիրը ստորագրել են ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանը, «Հայաստանի էնոտուրիզմի խորհուրդ» հասարակական կազմակերպության գործադիր տնօրեն Տիգրան Մարտիրոսյանը և «Արենի-1 քարայր» գիտահետազոտական հիմնադրամի տնօրենի պարտականությունները կատարող Բորիս Գասպարյանը:
Կարևորելով պատմամշակութային ժառանգության արժեքը, հանրահռչակումն ու հետագա սերունդներին փոխանցումը՝ կողմերը նախատեսում են համագործակցել՝ իրականացնելով համատեղ աշխատանքներ ՅՈՒՆԵՍԿՕ-ի համաշխարհային ժառանգության նախնական ցանկում ընդգրկելու նպատակով Վայոց ձորի մարզի «Արենի-1 քարայրը և հարակից գինեգործական լանդշաֆտը» հայտի մշակման ուղղությամբ։
ԿԳՄՍ նախարարի տեղակալ Ալֆրեդ Քոչարյանը կարևորել է համագործակցության հուշագրի ստորագրումը և նշել, որ համատեղ գործադրած ջանքերի արդյունքում տարիների դադարից հետո ՅՈՒՆԵՍԿՕ-ի համաշխարհային ժառանգության նախնական ցանկում գրանցվել են նոր հուշարձաններ, և այս գործընթացը պետք է լինի շարունակական:
«Իրականացվող աշխատանքը միտված է նաև երկրի տեսանելիության բարձրացմանը և զբոսաշրջության զարգացմանը»,- ասել է նախարարի տեղակալը և շնորհակալություն հայտնել գործընկերներին համատեղ կարևոր աշխատանքի համար»,- ասված է նախարարության հաղորդագրության մեջ:
