04.04.2026 | 20:03
ՃՏՊ՝ հրդեհի բռնկմամբ
«Նեմրա»-ն և Գարիկ-Սոնա դուետը՝ Կողբում․ թեժ համերգ՝ Վարդավառի տոնին․ ԼՈՒՍԱՆԿԱՐՆԵՐ
28.07.2025 | 16:35
Թեժ մթնոլորտ, բարձր տրամադրություն, տոնական աժիոտաժ ու հրավառություն․ հուլիսի 26-ին Տավուշի մարզի Կողբ գյուղում «Կողբ-Վարդավառ» փառատոնի շրջանակում տեղի ունեցավ «Նեմրա» ռոք խմբի և Գարիկ-Սոնա դուետի համերգը։
Այս տարի փառատոնն առանձնահատուկ էր նրանով, որ համերգին ներգրավված էր Հայաստանի պետական սիմֆոնիկ նվագախումբը։
Համերգը վարում էին բալետի արտիստ, դերասան, հաղորդավար Ռուբեն Մուրադյանն ու հաղորդավարուհի, դերասանուհի Հերմինե Ստեփանյանը, որն, ի դեպ, ծնունդով տավուշցի է․
«Երևանից գալիս ճանապարհին Հերմինեն ինձ պատմում էր, որ Տավուշում Վարդավառը յուրահատուկ կերպով են նշում և այստեղ մեծ ոգևորությամբ են սպասում տոնին»,-ասաց Ռուբեն Մուրադյանը։
«Հիմա ուզում եմ մի հարց տալ հյուրերին, որոնք եկել են Տավուշ աշխարհ, դուք գիտե՞ք տավուշցիներն իրենք իրենց ինչպես են անվանում։ Նայե՛ք ձեր շուրջը, անտառներին, ծառերին ու մտածե՛ք․․․Այո՛ «քոլեցիներ»,-կատակեց Հերմինե Ստեփանյանը՝ հավելելով, որ պատճառը գեղեցիկ բնությունն է։
«Նեմրա»-ի և Գարիկ-Սոնա դուետի ստեղծագործությունները հատուկ գործիքավորվել էին այնպես, որ դրանք ներդաշնակ լինեին սիմֆոնիկ նվագախմբի հետ և միևնույն ժամանակ համապատասխանեին Վարդավառի տոնակատարության տրամադրությանը։
Համերգին մասնակցում էր նաև դիջեյ MANUCHI-ն։ Տոնական միջոցառումն ավարտվեց հրավառությամբ։
Կողբ-Վարդավառին, որը համապետական միջոցառում է, այս տարի մասնակցել է շուրջ 10 000 մարդ։
Աննա Բաբաջանյան
Լուսանկարները՝ Անի Թամրազյանի
