22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
10 մլն դրամ՝ ՔՊ-ականի ընկերությանը Փրկարար ծառայության շենքի վերանորոգման համար
Քաղաքականություն
29.07.2025 | 11:30
Ներքին գործերի նախարարությունը 10 մլն 80 հազար դրամ կվճարի «ԱՐՏ ՕՖ ՇԻՆ» ՍՊԸ-ին Փրկարար ծառայության մասնաշենքում վերանորոգման աշխատանքների իրականացման համար։ Նախարարության հայտարարած գնանշման հարցմանը մասնակցել է 8 ընկերություն, որոնցից ամենացածր գինն առաջարկել է «ԱՐՏ ՕՖ ՇԻՆ»-ը։
Ուշագրավ է, որ այս ընկերություն հաճախակի է հաղթում պետական գնումներում և ստանում միլիոնավոր դրամների աշխատանքների պատվերներ․ օրինակ՝ նույն օրը՝ հուլիսի 27-ին, երբ ՆԳՆ-ն և ընկերությունը կնքել են պայմանագիրը, «ԱՐՏ ՕՖ ՇԻՆ»-ը շենքերի վերանորոգման մեկ այլ պայմանագիր էլ կնքել է «Մասնագիտական կրթության որակի ապահովման ազգային կենտրոն» հիմնադրամի հետ՝ 3․8 մլն դրամ արժեքով։ Դրանից 1 ամիս առաջ՝ հունիսի 23-ին, «ԱՐՏ ՕՖ ՇԻՆ»-ը մոտ 5 մլն դրամի պայմանագիր է կնքել «Սպորտի կառավարման կենտրոն» ՓԲԸ-ի հետ, իսկ հունիսի 12-ին 20․1 մլն դրամի պատվեր է ստացել Չարենցավանի համայնքապետարանից, և այլն։ Ընդհանուր առմամբ՝ վերջին 2 տարում այն ստացել է 189 մլն դրամի պետպատվեր։ Պատվիրատուների շարքում են ՀՀ վարչապետի աշխատակազմը, ՊԵԿ-ը, Հանրային հեռուստաընկերությունը և այլն։
Սա, թերևս, պատահական չէ․ «ԱՐՏ ՕՖ ՇԻՆ» ընկերությունը 2023 թվականին հիմնադրել է Տաթևիկ Տեր-Ղահրամանյանը։ Նա 2022-ի սեպտեմբերին Չարենցավանի ՏԻՄ ընտրությունների ժամանակ «Քաղաքացիական պայմանագիր» կուսակցության ընտրական ցուցակում է եղել։
Գայանե Խաչատրյան
