06.09.2026 | 10:45
Սպիտակ տուն․ ԱՄՆ բանագնացները Ռուսաստանում քննարկել են Ուկրաինայի հարցով «կոնկրետ ծրագրերը»
Ծառուկյանը դատի է տվել Աբովյան համայնքին․ պահանջում է անվավեր ճանաչել իրեն 200 հզ դրամով տուգանելու որոշումը
Հասարակություն
28.07.2025 | 13:20
«Բարգավաճ Հայաստան» կուսակցության առաջնորդ Գագիկ Ծառուկյանը դատական հայց է ներկայացրել Կոտայքի մարզի Աբովյան համայնքի դեմ։
Այս մասին տեղեկանում ենք «Դատալեքս» դատական-տեղեկատվական համակարգից։ Հայցադիմումով Ծառուկյանը պահանջում է անվավեր ճանաչել Աբովյան համայնքի 27․05․2025 թվականի որոշումը։ Թե ինչ որոշման մասին է խոսքը, Ծառուկյանի փաստաբանը չմեկնաբանեց՝ պատճառաբանելով, որ լիազորված չէ։
Համայնքապետարանի կայքում, սակայն, առկա է Ծառուկյանի վերաբերյալ որոշումը։
Ըստ այդ որոշման՝ Ծառուկյանը 100 հզ դրամի չափով տուգանվել է հողամասը ոչ նպատակային նշանակությամբ օգտագործելու համար (Վարչական իրավախախտումների վերաբերյալ օրենսգրքի 54-րդ հոդվածի 1-ին մասով) ու ևս 100 հզ դրամի չափով՝ գյուղական բնակավայրում սեփականության իրավունք ունեցող անձի կողմից առանց թույլտվության շինարարության թուլտվություն պահանջող շինարարական աշխատանքներ իրականացնելու համար (Վարչական իրավախախտումների վերաբերյալ օրենսգրքի 154-րդ հոդվածի 2-րդ մասով)։
Ըստ որոշման՝ Գագիկ Ծառուկյանը պարտավոր է որոշումն իրեն հանձնելու օրվանից 15-օրյա ժամկետում նշանակված տուգանքի գումարը մուծել Աբովյանի համայնքապետարանի հաշվեհամարին և վճարման անդորրագիրը ներկայացնել Աբովյան համայնքի ղեկավարին առընթեր վարչական հանձնաժողով:
Որոշումը կարող է բողոքարկվել կամ վարչական կարգով Աբովյան համայնքի ղեկավարին՝ այն սահմանված կարգով հանձնելու (հանձնված համարվելու) օրվանից հետո՝ երեսուն օրվա ընթացքում կամ Հայաստանի Հանրապետության վարչական դատավարության օրենսգրքով սահմանված դատական կարգով՝ վարչական ակտի ուժի մեջ մտնելու պահից երկամսյա ժամկետում։
Ծառուկյանը, փաստորեն, բողոքարկել է որոշումը։
Վարչական գործը մակագրվել է դատավոր Անի Չիլինգարյանին
Հիշեցնենք, որ Աբովյանի ներկայիս համայնքապետը Էդուարդ Բաբայանն է, որը նախկինում Ծառուկյանի թիկնազորի պետն էր։ Ծառուկյանին տուգանելու որոշումը ստորագրված է նրա կողմից։
Գայանե Խաչատրյան
Արաքս Մամուլյան
