11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
59․8 մլն դրամ նվիրատվություն․ «Հայրենիք» կուսակցության 2024-ի ծախսերն ու մուտքերը
Քաղաքականություն
28.07.2025 | 12:20
ԱԱԾ նախկին պետ Արթուր Վանեցյանի «Հայրենիք» կուսակցությունը 2024 թվականին 59․8 մլն դրամ ֆինանսավորում է ունեցել, որ գոյացել է միայն 25 քաղաքացիների նվիրատվություններից։ Ընդ որում՝ գրեթե բոլոր նվիրատվությունները 2․5 մլն դրամի չափով են։ Սա գումարի առավելագույն սահմանաչափն է, որ օրենքով թույլատրվում է 1 տարվա ընթացքում նվիրաբերել կուսակցությանը։
Սակայն նվիրատուների մեջ 2 անգամ հանդիպում է նույն անուն ազգանունը՝ Գոռ Հովհաննիսյան, որի նվիրատվության ընդհանուր չափը գերազանցել է թույլատրելի սահմանը՝ հասնելով 3 մլն դրամի։ Հաշվետվությունից հնարավոր չէ պարզել՝ արդյոք սա նո՞ւյն անձն է, թե՞ ոչ։
Հարկ է նշել, որ թեև կուսակցությունը պետական ֆինանասավորում չի ստանում, բայց ենթարկվել է աուդիտի, քանի որ մուտքեր-ելքերը գերազանցել են 25 մլն դրամը։ Աուդիտը «Հայրենիք»-ի հաշվետվության մեջ մեկ խախտում է արձանագրել․ «Կուսակցության կողմից վարձակալած տարածքային ստորաբաժանումների կոմունալ ծախսերի վճարումները կատարվել են ոչ թե կուսակացության կողմից, այլ՝ ֆիզիկական անձանց։ Հետևաբար՝ այդ վճարումները կհամարվեն ոչ դրամական նվիրատվություններ, և պետք է ներկայացվեն որպես բնեղեն նվիրատվություններ»։
Ուշագրավ է, որ «Հայրենիք»-ը 2024-ին ավելի շատ ծախսել է՝ ընդհանուր 60․2 մլն դրամ, քան ֆինանսական մուտքեր ունեցել․ գումարի մեծ մասը գույքի վարձակալության վճար և հարկեր են։
Գայանե Խաչատրյան
