Հեղեղվել էին փողոցներ, մայթեր, ստորգետնյա հատվածներ․ Արեյանը՝ ուրբաթ տեղացած անձրևի մասին․ ՏԵՍԱՆՅՈՒԹ

Հուլիսի 25-ին Երևանում տեղացած անձրևը եղել է նորմայի կրկնակի չափով, ինչի հետևանքով փողոցներ են հեղեղվել։ Այս մասին Երևանի քաղաքապետարանի գործակարգավարական նիստում զեկուցեց քաղաքապետի խորհրդական Կամո Արեյանը։

«Համաձայն Հիդրոմետ ծառայության հետ ճշտված տվյալների՝ ամսվա նորման հուլիսին եղել է 9 մմ, 20 րոպեում մայրաքաղաքում տեղացել է նորման կրկնակի գերազանցող տեղումների քանակ՝ 18 մմ։ Այսինքն՝ 20 րոպեում կրկնակի ավելի տեղում է եղել, քան մեկ ամսվա նորման էր։ Նման ինտենսիվ անձրևների պայմաններում, որքան էլ թողունակ և գործարկման ենթակա լինի համակարգը, չէր կարող ընդունել անձրևի այդ ամբողջ ծավալը։ Հետևապես, Երևանում հեղեղվել էին փողոցներ, մայթեր, ստորգետնյա տրանսպորտային հանգույցների հատվածներ»,- նշեց Արեյանը։

Նրա խոսքով՝ «Վեոլիա ջուր» ընկերության տնօրինության, կոմունալ տնտեսության վարչության պետի, վարչական շրջանների ղեկավարների աշխատակազմերի հետ շրջել են դրսում, և անձրևի դադարից մոտ 10-15 րոպե հետո ջրականգ չի եղել մայրաքաղաքում։

Քաղաքապետի խորհրդականը տեղեկացրեց նաև, որ հեղեղատար համակարգի՝ գոյություն չունեցող հատվածները գույքագրված են։

«Վերակառուցման ենթակա համակարգերը 50 հասցեներում ամբողջ ծավալով գույքագրված են։ Պատվիրել ենք 50 հասցեների կառուցման ու վերակառուցման նախագծա-նախահաշվային փաստաթղթերը։ Բոլորը պատրաստ են, անցել են փորձաքննություն։ Ծավալը ֆինանսական առումով կազմում է 10 մլրդ 88 մլն դրամ, 52 կմ 695 մետր»,- նշեց Արեյանը։

Մանրամասները՝ տեսանյութում։