15.02.2026 | 11:47
Վթարային ջրանջատում Երևանում և Կոտայքի մարզում
Օվերչուկը հայտնել է՝ ինչ հարցեր են քննարկել Փաշինյանն ու Միշուստինը
Քաղաքականություն
24.07.2025 | 15:38
Ռուսաստանի վարչապետ Միխայիլ Միշուստինը իր հայ գործընկեր Նիկոլ Փաշինյանի հետ քննարկել է առևտրատնտեսական համագործակցության զարգացման հարցեր: Այս մասին հայտարարել է ՌԴ փոխվարչապետ Ալեքսեյ Օվերչուկը, փոխանցում է Ինտերֆաքսը։
«Աշխատանքային զրույց է տեղի ունեցել Հայաստանի վարչապետ Նիկոլ Փաշինյանի հետ։ Մենք կենտրոնացել ենք առևտրատնտեսական համագործակցության զարգացման վրա։ Իհարկե, մենք մտահոգված ենք երկու երկրների միջև առևտրաշրջանառության անկման կապակցությամբ»,- լրագրողներին ասել է Օվերչուկը։
Նրա խոսքով՝ վարչապետները քննարկել են իրավիճակը բարելավելու համար անհրաժեշտ քայլերը։
«Մենք քննարկել ենք Ռուսաստանի ներդրումները Հայաստանի Հանրապետությունում։ Մենք նաև քննարկել ենք Հարավային Կովկասի օրակարգին վերաբերող հարցեր։ Ընդհանուր առմամբ, զրույցը շատ օգտակար էր։ Իհարկե, մենք քննարկում ենք Եվրասիական տնտեսական միության շրջանակում փոխգործակցության հարցեր, և այս տեսանկյունից ուշադրություն ենք դարձնում, թե ինչպես են նման որոշումները (ԵՄ-ին միանալու) կայացվում Հայաստանի Հանրապետությունում՝ նորմատիվ իրավական ոլորտում։ Կան որոշ կառավարական ակտեր, որոնք մեզ մոտ հարցեր են առաջացնում»,- նշել է ՌԴ փոխվարչապետը։
Ըստ Օվերչուկի՝ խոսքը, մասնավորապես, վերաբերում է ԵՄ-ի, ԱՄՆ-ի և այլ երկրների չափանիշներին համապատասխան հավաստագրված սննդամթերքի ընդունմանը, որոնք չեն համապատասխանում ԵՏՄ հավաստագրմանը։
«Ընդհանուր առմամբ, Հայաստանը, և դա այսօր նույնպես քննարկվել է, տրամադրված է շարունակել աշխատանքը Եվրասիական տնտեսական միությունում»,- հայտարարել է նա։
Հիշեցնենք, որ Ալթայի Հանրապետությունում անցկացվող Բնության և շրջակա միջավայրի պաշտպանությանը նվիրված միջազգային համաժողովի շրջանակում այսօր կայացել է Հայաստանի վարչապետ Նիկոլ Փաշինյանի և Ռուսաստանի Դաշնության Կառավարության ղեկավար Միխայիլ Միշուստինի հանդիպումը։
Թարգմանությունը՝ Էմմա Չոբանյանի
