20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ինչպես կքվեարկեին քաղաքացիները, եթե ԵՄ անդամակցության հանրաքվեն լիներ առաջիկա կիրակի․ IRI-ի հարցման արդյունքները
Քաղաքականություն
22.07.2025 | 19:01
Եթե առաջիկա կիրակի ԵՄ անդամակցության հանրաքվե անցկացվեր՝ կողմ կքվեարկեր հայաստանցիների 49%-ը, դեմ՝ 15%-ը։ Քվեարկությանը ընդհանրապես չէր մասնակցի հարցվածների 31%-ը։ Տվյալներն ամփոփված են Հայաստանում անցկացված սոցհարցման մեջ։ Հետազոտությունն իրականացվել է Միջազգային հանրապետական ինստիտուտի նախաձեռնությամբ։
2024 թվականի սեպտեմբերին Եվրամիությանը անդամակցելու հանրաքվեին կողմ էր քվեարկել հարցվածների 58%-ը, դեմ՝ 13%-ը։ Քվեարկությանը ընդհանրապես չէր մասնակցի հարցվածների 25%-ը
Հարցմանն անդրադարձ է եղել նաև Հայաստանի արտաքին գործընկերներին։ Հարցվածների կեսից ավելին՝ 53%-ը Հայաստանի համար քաղաքական գործընկեր է համարում Իրանին։ Ապա հաջորդում է Ֆրանսիան՝ 48% և Հնդկաստանը՝ 43%։ Ռուսաստանին ՀՀ-ի քաղաքական գործընկեր համարում է ՀՀ քաղաքացիների 45% , իսկ 27 % այդ երկիրը համարում է քաղաքական սպառնալիք։ Հայաստանի հետ ամենավատ հարաբերություններ ունեցող պետությունների եռյակն, ըստ IRI-ի, Ադրբեջանն է, Թուրքիան և Իսրայելը։
Հետազոտության ընտրանքը կազմված է 18 տարին լրացած 1,505 ՀՀ քաղաքացիներից և Լեռնային Ղարաբաղից բռնի տեղահանված ԼՂ նախկին բնակիչներից, ովքեր այժմ բնակվում են Հայաստանում (որոնք կարող են լինել կամ չլինել քաղաքացիներ)։ Այն քաղաքացիները, ովքեր ապրել են Հայաստանում ավելի քիչ, քան 6 ամիս, չեն ներառվել ընտրանքում։ Ընտրանքը ներկայացուցչական է բջջային հեռախոս օգտագործող չափահաս բնակչության համար, որը չի ներառում չափահաս բնակչության մոտ 1.7%-ը։
Ստացված ընտրանքը կշռվել է ըստ տարիքի, սեռի և բնակավայրի տիպի՝ ըստ Ազգային վիճակագրական ծառայության 2023 թվականի տվյալների։ Այս հարցման արդյունքում բարձրագույն կրթությամբ հարցվողների մասնաբաժինն ընտրանքում ավելին էր՝ համեմատած ՄՀԻ այլ հետազոտությունների։ Ընտրանքում կրթական մակարդակը նախորդ հետազոտություններին և պաշտոնական վիճակագրությանը համապատասխանեցնելու համար ավելացվել է կրթության կշռի գործոն։ Կրթության կշռի նպատակային ցուցանիշը հաշվարկվել է՝ հիմք ընդունելով 2022 թվականի մարդահամարի տվյալների (18 և բարձր տարիքի անձանց համար) և հարցված ընտրանքի կրթական մակարդակի միջինը։
Հարցմանը մասնակցելու ցուցանիշը 25% է։
Անի Թամրազյան
