19.12.2025 | 11:00
Բարդ ճանապարհ՝ A-ից B կետ․ Եվրոպայի հաջող փորձն ու Հայաստանի հնարավորությունը
Փաշինյանը հայտնում է Գարեգին Բ-ի դեմ հանրահավաք հրավիրելու մասին, ընդդիմությունից արձագանքում են՝ հակազդելու են
20.07.2025 | 14:19
Վարչապետ Նիկոլ Փաշինյանը քիչ առաջ գրառում է կատարել Facebook սոցիալական ցանցում, որով, ըստ էության, հայտնում է, որ առաջիկայում Գարեգին Բ ամենայն հայոց կաթողիկոսի դեմ բողոքի հանրահավաք է անցկացնելու Էջմիածնում։
«Ապրեք աղոթքով, պահեցողությամբ, ծոմապահությամբ և պատրաստվեք Մեծ հոգևոր հանդիպման Էջմիածնի կենտրոնական հրապարակում»,- գրել է Փաշինյանը՝ չհստակեցնելով, թե երբ է տեղի ունենալու այդ «հոգևոր հանդիպումը»։
Հիշեցնենք՝ արդեն երկու ամիս է, որ Փաշինյանը գրեթե ամենօրյա ռեժիմով անդրադառնում է կաթողիկոսի և մյուս բարձրաստիճան հոգևորականների՝ իր պնդմամբ կուսակրոնության ուխտի խախտմանը։
Փաշինյանն այդ արշավի մեկնարկը տվեց մայիսի 29-ին, երբ կառավարության նիստի ժամանակ հայտարարեց, որ Հայ առաքելական որոշ եկեղեցիներ վերածվել են չուլանի։ Այնուհետ առաջ քաշեց Գարեգին Բ-ի զավակ ունենալու հարցը, ապա հայտարարեց, որ կաթողիկոսը պետք է լքի Վեհարանը։ Ավելին՝ վարչապետը նաև հանձնախումբ է ձևավորել, որը պետք է զբաղվի կաթողիկոսի հեռացմամբ։ Նախորդ շաբաթ հրավիրված ասուլիսում էլ նա հայտնեց, թե ինքն է առաջնորդելու կաթողիկոսի հեռացման գործընթացը, ինչպես 2018-ին գլխավորում էր Սերժ Սարգսյանի հեռացման գործընթացը։
Փաշինյանի՝ Էջմիածնում հանրահավաք հրավիրելու հայտարարության մասին Factor.am-ը փորձեց մեկնաբանություն ստանալ Մայր Աթոռի տեղեկատվական կենտրոնից, սակայն մեր հեռախոսազանգերն անպատասխան մնացին։
Իսկ ահա ԱԺ «Պատիվ ունեմ» խմբակցության ղեկավար Հայկ Մամիջանյանը Փաշինյանի՝ Էջմիածնի հրապարակում հավաքվելու առաջարկի մասին նշում է՝ արդեն կասկած չկա, որ Փաշինյանը պատրաստ է ցանկացած քայլի։
«Ես կասկած չունեմ, որ Փաշինյանը եկեղեցու դեմ արշավի ընթացքում ոչ մի բանի առաջ չի կանգնելու, մենք կանգնած ենք, եկեղեցու, Վեհափառի կողքին։ Ինչ որ անի՝ դրա հակազդեցությունը կստանա հայրենասերների կողմից»,- նշեց ընդդիմադիր խմբակցության ղեկավարը։
Նարեկ Կիրակոսյան
