15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Թրամփ․ «Հրաշք ենք գործել, Հայաստանը և Ադրբեջանը մոտ են Խաղաղության համաձայնագրի ստորագրմանը»
Քաղաքականություն
19.07.2025 | 10:07
ԱՄՆ նախագահ Դոնալդ Թրամփը հայտարարել է, որ Հայաստանը և Ադրբեջանը մոտ են Խաղաղության համաձայնագրի ստորագրմանը, և դա պետք է տեղի ունենա մոտ ժամանակներում։
«Հայաստան, Ադրբեջան, մենք այնտեղ հրաշք ենք գործել, և դա (խաղաղության համաձայնագիրը) արդեն մոտ է նպատակին», –հայտարարել է Թրամփը ԱՄՆ սենատորների հետ ընթրիքի ժամանակ։ Նրա խոսքը հեռարձակել են ամերիկյան հեռուստաընկերությունները։
Օրերս Հայաստանի վարչապետը հաստատել է, որ ԱՄՆ-ն առաջարկ է արել Հարավային Կովկասում հաղորդուղիների ապաշրջափակմանը ամերիկյան ընկերության մասնակցության վերաբերյալ։ Factor TV-ի տեղեկություններով՝ խոսքը վերաբերում է ամերիկյան կողմի աջակցությամբ նոր կոմունիկացիաների ստեղծմանը՝ երկաթգծերի և գերարագ ավտոճանապահների կառուցում Արաքս գետին զուգահեռ ճանապարհի վրա, մալուխային գծերի անցկացում Հայաստանի կենտրոնական հատվածներով։
Վարչապետը նաև հաստատել է, որ Ադրբեջանի հետ կա բանակցություն Խաղաղության համաձայնագիրը նախաստորագրելու շուրջ։ Սակայն դեռևս պաշտոնական աղբյուրները չեն հայտնում՝ արդյո՞ք դա տեղի կունենա ամերիկյան միջնորդությամբ՝ ինչը ակնարկում է նախագահ Թրամփը, թե՞ նախաստորագրում՝ երկկողմ ձևաչափով։ Ամեն դեպքում, նախագահ Թրամփի խոսքից կարելի է ենթադրել, որ ԱՄՆ-ն ներգրավված է համաձայնագրի կնքման բանակցություններում։
Ռոբերտ Անանյան
