Հրատապ բաց մրցույթ՝ վաղուց հայտնի միջոցառման կազմակերպման համար

Հայաստանի վարչապետի աշխատակազմը հրատապ բաց մրցույթ է անցկացրել այս տարվա օգոստոսի 5-7-ը կայանալիք Ազգային երիտասարդական երկրորդ համաժողովի կազմակերպման համար: Հաղթող է ճանաչվել «Աութսորս» ՍՊ ընկերությունը, որը 2 տարի առաջ կազմակերպել էր Ազգային երիտասարդական առաջին համաժողովը։

Թե ինչու է մրցույթն անցկացվել հրատապության հիմքով, Armeps էլեկտրոնային գնումների համակարգում առկա փաստաթղթերում այս մասին որևէ հիմնավորում չկա։ Ընդգծենք, որ առաջին համաժողովից հետո անցել է 2 տարի, և օգոստոսին նախատեսվող համաժողովի նախապատրաստական  աշխատանքները քննարկվել են առնվազն այս տարվա փետրվարին, ապրիլին հրապարակվել է դրա մասնակից դառնալու հրավերը, և միայն մայիսի 19-ին է հայտարարվել հրատապ բաց մրցույթ։ Բացի «Աութսորս»-ից, եղել է նաև 2-րդ մասնակից՝ «Շարմ Հոլդինգ» ՍՊԸ-ն, որն ավելի բարձր գին է ներկայացրել՝ 236․6 մլն դրամ։

Այս տարի միջոցառման կազմակերպման համար բյուջեից կհատկացվի 234 մլն դրամ՝ 25․2 մլն-ով ավելի, քան 2023-ին էր։ Նկատենք, որ 2 տարվա ընթացքում 1 մասնակցի հաշվով միջին ծախսը նվազել է մոտ 40%-ով․ 2023-ին համաժողովը կազմակերպվել էր 450 մասնակցի հաշվով, այս տարի նախատեսվում է, որ 800 մասնակից կլինի։ Այնուամենայնիվ, ինչպես գրել էր Factor.am-ը, 2018-ից հետո Հայաստանում համաժողովների անցկացումը «կտրուկ թանկացել է»։ Օրինակ՝ 2017 թ-ին Հայաստան-Սփյուռք 6-րդ համաժողովի կազմակերպման համար, որը նույնպես եռօրյա էր ու ուներ 1500 սփյուռքահայ մասնակից, ծախսվել էր մոտ 85 մլն դրամ, այսինքն՝ 1 մասնակցի հաշվով 57 հազար դրամ՝ ներկայիս 293 հազար դրամի փոխարեն։

Հիշեցնենք, որ ըստ պետական ռեգիստրի, «Աութսորս» ՍՊ ընկերությունը հիմնադրվել է 2015 թվականին, միակ սեփականատերն ու ղեկավարը Արմեն Ա․ Սարգսյանն է։ Ընկերությունը պետական գնումներին ակտիվորեն սկսել է մասնակցել 2018 թ-ից հետո։

Գայանե Խաչատրյան