16.07.2026 | 21:58
ԿԼ. «Ալաշկերտը» վերջին վայրկյաններին փրկվեց պարտությունից ու հաղթեց հետխաղային 11-մետրանոցներով․ ՏԵՍԱՆՅՈՒԹ
Ուկրաինան Ադրբեջանին առաջարկել է օգտագործել իր գազի պահեստարանները
Քաղաքականություն
14.07.2025 | 18:41
Ուկրաինայի էներգետիկայի նախարար Գերման Գալուշչենկոն հայտարարել է իր ադրբեջանցի գործընկեր Փարվիզ Շահբազովի հետ միջկառավարական հանձնաժողովի նիստի արձանագրության և էներգետիկ համագործակցության հետագա քայլերի «ճանապարհային քարտեզի» ստորագրման մասին։ Փաստաթուղթը ստորագրվել է հուլիսի 13-ին Բաքվում, որտեղ տեղի է ունեցել ուկրաինա-ադրբեջանական տնտեսական համագործակցության հանձնաժողովի նիստը, գրում է The Insider-ը։
Կողմերը քննարկել են ադրբեջանական գազն Ուկրաինա մատակարարելու և միջազգային պահեստավորման համար ուկրաինական ստորգետնյա գազապահեստարանների օգտագործման հնարավորությունը։ Գալուշչենկոն ընդգծել է, որ ուկրաինական պահեստարանները, որոնք Եվրոպայում ամենամեծն են, հասանելի են օտարերկրյա ընկերությունների համար «մաքսային պահեստի» ռեժիմով՝ առանց հարկերի և վճարների։
Ուկրաինական պատվիրակությունը Բաքվում հանդիպել է նաև Ադրբեջանի վարչապետ Ալի Ասադովի հետ: Գալուշչենկոյի խոսքով՝ ուշադրություն է դարձվել էներգետիկ անվտանգության ամրապնդման ռազմավարական նախագծերի մշակման աջակցությանը: Գազային ոլորտից բացի՝ կողմերը քննարկել են վերականգնվող էներգիայի ոլորտում համագործակցությունը: Գալուշչենկոն նաև շնորհակալություն է հայտնել Ադրբեջանին Ուկրաինայի էներգետիկ ոլորտին տրամադրված մարդասիրական օգնության համար: Նրա խոսքով՝ նման օգնության ծավալը կազմել է մոտ 42 միլիոն դոլար:
Ուկրաինայի նախագահ Վլադիմիր Զելենսկին ավելի վաղ հայտարարել էր, որ Ուկրաինան պատրաստ է տրամադրել իր ենթակառուցվածքներն ադրբեջանական գազի Եվրոպա տարանցման համար, սակայն բացառում է ռուսական տարանցման վերականգնման հնարավորությունը։ Նրա խոսքով՝ ինքն այդ հարցը քննարկել է Ադրբեջանի նախագահ Իլհամ Ալիևի հետ։
Զելենսկին նշել էր, որ Ադրբեջանի արտահանման ներուժը տարեկան կազմում է մոտ 25 միլիարդ խորանարդ մետր գազ, և Ուկրաինան կարող է արագ միանալ փոխադրմանը, եթե եվրոպական երկրներից ստանա համապատասխան խնդրանք։
Կիևի կողմից «Գազպրոմի» հետ 2024 թվականին ավարտված պայմանագիրը երկարաձգելուց հրաժարվելու ֆոնին՝ Եվրոպական հանձնաժողովը պատրաստել է ռուսական գազի (թե՛ խողովակաշարային, թե՛ հեղուկացված բնական գազի) ներմուծման լիակատար արգելքի ծրագիր մինչև 2027 թվականի վերջը։ Reuters-ի կողմից հրապարակված նախագծի համաձայն՝ նոր մատակարարումների արգելքn ուժի մեջ կմտնի 2026 թվականի հունվարին, իսկ գործող պայմանագրերը կավարտվեն մինչև 2028 թվականը։
Թարգմանությունը՝ Էմմա Չոբանյանի
