«Փոքրիկ իշխանի» ապակյա արձան, ափսե և զարդատուփ․ Փաշինյանը նվերներ է ստացել օտարերկրյա գործընկերներից

Վարչապետ Նիկոլ Փաշինյանն այս ամիս հինգ թանկարժեք նվեր է հաշվառել ԿԿՀ, որոնք ստացել է մայիս-հունիս ամիսներին։ Համաձայն ԿԿՀ ներկայացրած «Հանրային պաշտոն զբաղեցնող անձի կամ հանրային ծառայողների նվերների հաշվառման ձևաթղթի»՝ ԻԻՀ պաշտպանության և զինված ուժերի աջակցման նախարար Ազիզ Նասիրզադեն Թավրիզի նկարազարդ գորգ է նվիրել՝ դեկորատիվ շրջանակի մեջ։ Նվերի արժեքը 502 000 դրամ է։ Փաշինյանն այն ստացել է Իրանի պաշտոնական պատվիրակության Հայաստան կատարած պաշտոնական այցի ժամանակ։  

Կիպրոսի Ներկայացուցիչների պալատի նախագահ Աննիտա Դիմիտրիուից Փաշինյանը հունական պատմությունից ոգեշնչված դեկորատիվ ափսե է նվեր ստացել՝ «Իլիաս Լալաունիս» ապրանքանիշին պատկանող (925 հարգի արծաթ և բրոնզ)։ Ափսեի առաջամասում պատկերված է արև, իսկ արևի ներքևի հատվածում գրված է Cyprus Aeterna: Փաշինյանը նվերը ստացել է Կիպրոսի Ներկայացուցիչների պալատի նախագահի պատվիրակության հյուրընկալության ժամանակ։ Նվերի արժեքը 42 800 դրամ է։ 

Ֆրանսիայի հանրապետության Եվրոպայի և արտաքին գործերի նախարար Ժան-Նոել Բարոն Փաշինյանին Sèvres ապրանքանիշի ճենապակյա կլոր զարդատուփ է նվիրել։ Այն ոսկեգույն զարդանախշով է և պատրաստված է 24 կարատանոց ոսկուց՝ Sèvres-ի կապույտ ֆոնի վրա: Արժեքը 336 000 դրամ է։ Ֆրանսայի արտաքին գործերի նախարարը զարդատուփը նվիրել է Հայաստան կատարած այցի ժամանակ։

Ֆրանսիայի Օվերն-Ռոն-Ալպ ռեգիոնի նախագահ Ֆաբրիս Պանկուկը Հայաստան կատարած այցի շրջանակում Հայաստանի վարչապետին «Neamedia» ապրանքանիշի Փոքրիկ Իշխանի ապակյա, թափանցիկ արձան է նվիրել։ Արձանը ստեղծվել է Անտուան դը Սենտ-Էքզյուպերիի ժառանգների հետ համագործակցությամբ և աջակցությամբ։ Նվերի արժեքը 46 000 դրամ է։ 

Վրաստանի ներքին գործերի նախարար Գելա Գելաձեն Նիկոլ Փաշինյանին «Քվևրի՝ խաղողի ողկույզով» բրոնզե արձանիկ է նվիրել՝ վանակատե հիմքի վրա։ Խաղողի ողկույզները պատրաստված են ավենտուրից։ Արձանիկի արժեքը 353 հազար դրամ է։  

Հիշեցնենք՝ «Հանրային ծառայության մասին» օրենքում կատարված փոփոխությունների արդյունքում սահմանվել են հանրային ծառայողների կողմից նվերներ ընդունելու վերաբերյալ նոր կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:

Անի Թամրազյան