07.03.2026 | 19:37
Ինչ իրավիճակ է ճանապարհներին
Ահաբեկչության կազմակերպման մասին պնդումներն ի սկզբանե եղել են անհիմն․ ՀՅԴ Հայաստանի ԳՄ հայտարարությունը
Քաղաքականություն
13.07.2025 | 14:49
ՀՅԴ Հայաստանի գերագույն մարմնից հայտնում են, որ այսօր՝ հուլիսի 13-ին, ՁՊՎ-ից ազատ են արձակվել նախորդ օրերին ապօրինի կերպով ձերբակալված անձանցից հինգը։
«Նրանցից որևէ մեկի նկատմամբ մինչ այս պահը որևէ մեղադրանք չի առաջադրվել՝ իրավական հիմքերի բացակայության պատճառով։
Ավելի վաղ երկու ամսով կալանավորվել է տասնութամյա Անդրանիկ Չամիչյանը, ում մոտ հայտնաբերվել էին բացառապես օրինական և սթրայքբոլ խաղի համար նախատեսված պարագաներ։
Ձերբակալվածներից մեկ այլ քաղաքացու նկատմամբ, որի բնակարանում ավելի ուշ հայտնաբերվել էր մեկ նռնակ, նույնպես կիրառվել է երկամսյա կալանք։ Ուշագրավ է, որ այս դեպքում մեղադրող կողմը հրաժարվել է ահաբեկչության կազմակերպման մեղադրանքից, և քաղաքացին կալանավորվել է միայն ապօրինի զինամթերք պահելու մեղադրանքով։
Այսպիսով, կրկին փաստում ենք, որ, ինչպես արձանագրել էինք մեր նախորդ հայտարարություններում, ահաբեկչության կազմակերպման մասին պնդումներն ի սկզբանե եղել են անհիմն։ Կրելով բացահայտ քաղաքական ենթատեքստ ու նպատակադրում՝ դրանք նպատակ էին հետապնդում մոլորեցնել և ահաբեկել հանրությանը։
Շինծու այս քրեական գործերի բոլոր մանրամասները հանրությանը ներկայացնելու նպատակով, երկուշաբթի՝ հուլիսի 14-ին, ժամը 14:00-ին ՀՅԴ «Սիմոն Վրացյան» կենտրոնում (Հանրապետության 30) կկազմակերպվի մամուլի ասուլիս՝ գործով ներգրավված փաստաբանների մասնակցությամբ։
ԶԼՄ բոլոր ներկայացուցիչներին սիրով հրավիրում ենք լուսաբանելու ասուլիսը»,-նշվում է հաղորդագրության մեջ։
Քննչական կոմիտեից Factor.am-ին տեղեկացրել են, որ ձերբակալության առավելագույն ժամը լրանալու հիմքով քրեական վարույթի շրջանականերում ձերբակալված 5 անձինք ազատ են արձակվել: Նախաքննությունը շարունակվում է:
