24.06.2026 | 05:04
ԱԱ-2026. Խորվաթիան տարավ առաջին հաղթանակը. ՏԵՍԱՆՅՈՒԹ
ՀՅԴ 18-ամյա անդամ Անդրանիկ Չամիչյանը կալանավորվեց
Հասարակություն
11.07.2025 | 13:13
«Որևէ անկանխատեսելի բան տեղի չունեցավ. 18 տարեկան Անդրանիկ Չամիչյանը կալանավորվեց երկու ամսով՝ Strikeball խաղի սիրահար լինելու համար»,- դատարանի որոշման հրապարակումից հետո հայտարարեց փաստաբան Ռուբեն Մելիքյանը։
Անդրանիկ Չամիչյանը ՀՅԴ ՀԵՄ անդամ է, ձերբակալվել էր երեկ ՀՅԴ գրասենյակների խուզարկություններից հետո.
«Անունը դրեցին ահաբեկչության նախապատրաստություն ու կալանավորեցին։ Թե ինչ ահաբեկչություն էր, ով էր այդ ահաբեկչությունն անում և ում դեմ էր անում, որևէ տեղեկություն քննչական մարմիններն այս պահի դրությամբ չունեն»,- նշեց Մելիքյանը։
Փաստաբանի խոսքով՝ դատարանի կողմից «միակ դրական քայլն այն է», որ թեև նախաքննական մարմինը միջնորդել էր առհասարակ փակել տեսակցությունները բոլորի, այդ թվում՝ ծնողների հետ, դատարանն «այդ մի փոքր մարդասիրական քայլը արեց» և թույլատրեց ծնողների հետ տեսակցությունը.
«Չամիչյանը, իրականում լուրջ առողջական խնդիր ունեցող տղա է. հենց այդ պատճառով էլ, թեև 18 տարեկանը լրացել էր, սակայն նա բանակում չէ»։
Հիշեցնենք՝ երեկ վաղ առավոտից իրավապահները խուզարկություններ էին իրականացրել ՀՅԴ Հայաստանի ԳՄ անդամ, «Հայաստան» խմբակցության պատգամավոր Գեղամ Մանուկյանի և ՀՅԴ Հայաստանի Գերագույն մարմնի աշխատակազմի ղեկավար Վահագն Մաթինյանի, ինչպես նաև «Եղվարդ» խոշորացված համայնքի ավագանու անդամ, ՀՅԴ Հայաստանի Երիտասարդական միության Կենտրոնական վարչության նախագահ Գևորգ Մուրադյանի բնակարաններում։ Ավելի ուշ Քննչական կոմիտեն հայտնեց, որ ահաբեկչության նախապատրաստության, ինչպես նաև՝ հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառության վերաբերյալ ՀՀ քրեական օրենսգրքի 43-308-րդ հոդվածի 1-ին մասով և 335-րդ հոդվածի 1-ին մասով նախաձեռնված քրեական վարույթի շրջանակներում իրականացված մեծածավալ քննչական և վարութային գործողությունների, այդ թվում՝ մի շարք հասցեներում կատարված խուզարկությունների արդյունքում հայտնաբերվել են էլեկտրական անդրապայթիչ (детонатор), որը նախատեսված է հեռավար գործարկելու համար, դրա բաղկացուցիչ մասեր, մարտական նռնակ, մարտական նռնակի պայթուցիչ (запал), վառոդ, ռադիոկապի միջոցներ, քննության համար հետաքրքրություն ներկայացնող այլ իրեր և առարկաներ։ Ձերբակալվել էր 7 անձ։
Ռոզա Վարդանյան
