05.10.2026 | 22:33
Հայաստանի մի շարք հասցեներում էլեկտրաէներգիայի անջատումներ կլինեն
Միքայել Աջապահյանի կալանքի դեմ բողոքը մակագրվել է դատավոր Վաչե Մարգարյանին
Հասարակություն
10.07.2025 | 11:20
Միքայել արքեպիսկոպոս Աջապահյանի կալանքի դեմ բողոքը մակագրվել է Վերաքննիչ քրեական դատարանի դատավոր Վաչե Մարգարյանին։ Այս մասին Factor TV-ին հայտնեցին դատարանից։
Հիշեցենք, որ հոգևորականին մեղադրում են իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչեր հնչեցնելու համար (Քրեական օրենսգրքի 422-րդ հոդված): Նա մեղադրանքը չի ընդունում:
Ըստ վարույթի նյութերի՝ Միքայել արքեպիսկոպոս Աջապահյանը լրատվամիջոցներին տված հարցազրույցների ընթացքում հայտնել է, որ պետք է ռազմական հեղաշրջում կատարել: Մինչդեռ «Իրազեկ քաղաքացիների միավորում» հասարակական կազմակերպությունը դեռ 2023-ին Աջապահյանի կողմից արված նույն արտահայտությունների համար դիմել էր Դատախազություն և հարցրել՝ արդյոք նրա արարքում առկա չե՞ն Քրեական օրենսգրքի 422-րդ հոդվածի հատկանիշներ: Հարցմանն ի պատասխան հասարակական կազմակերպությանը պատասխանել են, որ հանցագործության հատկանիշներ առկա չեն։
Սրբազանին կալանավորելու որոշումը կայացվել է հունիսի 28-ին՝ Երևանի քրեական դատարանի դատավոր Մասիս Մելքոնյանի կողմից։
Դատավոր Վաչե Մարգարյանը, որին մակագրվել է Աջապահյանի կալանքի դեմ բողոքը, հանրության ուշադրության կենտրոնում հայտնվել է տարիներ առաջ՝ Հայաստանի երկրորդ նախագահ Ռոբերտ Քոչարյանին առաջին անգամ կալանավորելու որոշմամբ։ Այս որոշումից ամիսներ անց հրապարակվել էր 2018-ին ԱԱԾ պետ Արթուր Վանեցյանի և ՀՔԾ պետ Սասուն Խաչատրյանի հեռախոսային խոսակցության ձայնագրությունը, որում շրջանառվում էր նաև Վաչե Մարգարյանի անունը։
Արաքս Մամուլյան
