Քաղաքականություն
10.07.2025 | 12:23
Ռուսական Storm-1516 քարոզչական խումբը, որը զբաղվում է համացանցում կեղծ տեղեկություններ տարածելով, սկսել է օգտագործել իրական լրագրողների ինքնությունները՝ իրենց կեղծ կայքերում նյութեր հրապարակելով իրենց անունից, գրում է The Insider-ը։
Gnida Project-ի ապատեղեկատվության վերլուծաբանները հայտնում են, որ վերջերս հայտնաբերել են առնվազն չորս նման դեպք։ Այդ հրապարակումներից մեկն ուղղված է եղել Մոլդովային, երկուսը՝ Ֆրանսիային ու Հայաստանին, իսկ վերջինը՝ Գերմանիային։
Մասնավորապես, Մոլդովայի նախագահ Մայա Սանդուի դեմ արշավի շրջանակում կեղծ The EU Insider կայքում (insider.eu.com) հրապարակվել է Ռադու Դումիտրեսկուի ստորագրությամբ հոդված։ Նա իրական լրագրող է, որն աշխատում է ռումինական անգլալեզու Romania Insider-ում (romania-insider.com): Մայիսի 22-ին հրապարակված հոդվածում պնդում կա, որ Քիշնևի քաղաքապետը Մայա Սանդուին մեղադրել է USAID-ի կողմից հատկացված միջոցները յուրացնելու մեջ։
Այնուհետև «Storm-1516»-ն օգտագործել է ֆրանսիական «Public» պարբերականի (public.fr) հինգ լրագրողների անուններ, այդ թվում՝ Ռոմեն Ֆիասկետիի: Նրա անվան տակ հոդված է հրապարակվել հունիսի 25-ին կեղծ «Courrier France 24» (courrierfrance24.fr) կայքում: Դրանում պնդվում է, որ ֆրանսիական պետական Orano ընկերությունը միջուկային թափոններ է ուղարկում Հայաստան և նվիրատվություններ անում վարչապետ Նիկոլ Փաշինյանի հետ կապված հիմնադրամին։
Հուլիսի 1-ին կեղծ «Enquete du Jour» կայքում (enquetedujour.fr) հրապարակված հոդվածում էլ հաղորդվել է վիրաբույժի մահվան մասին, որը, իբր, «կապված է Բրիժիթ Մակրոնի տրանսգենդեր ինքնության մասին լուրերի հետ»։
Վերջապես, հուլիսի 4-ին «կանադական» Toronto Journal կայքում (torontojournal.ca) հրապարակվել է հոդված, որում պնդում կա, թե Գերմանիայի կանցլեր «Ֆրիդրիխ Մերցը Կանադայում որսորդության ժամանակ անօրինական կերպով սպիտակ արջերի է սպանել»։ Տեքստի հեղինակը նշված չէ, սակայն Toronto Journal-ի հեղինակների ցանկում ներառված են չորս լրագրողներ, որոնք իրականում աշխատում են Toronto Star-ում։
Gnida Project-ը նաև հաղորդում է Նորվեգիայի դեմ Storm-1516-ի առաջին հայտնաբերված արշավի մասին: Հուլիսի 8-ին նորաստեղծ ndc.eu.com կայքը, որը, իբր, պատկանում է «բնապահպանական ՀԿ-ի», հրապարակել է հոդված, որում պնդվում է, որ Նորվեգիան գտնվում է բնապահպանական ճգնաժամի մեջ՝ Նիտելվա գետի խիստ աղտոտման պատճառով։
Լրատվամիջոցն ընդգծում է՝ ապատեղեկատվության վերլուծաբանները Նորվեգիայի վրա հարձակումները կապում են այն բանի հետ, որ այն ընտրվել է Internet Governance Forum-ի անցկացման համար, որը տեղի է ունեցել հունիսին։ Ռուսաստանը միջոցառումը հյուրընկալելու հայտ էր ներկայացրել դեռևս 2020 թվականին։
Թարգմանությունը՝ Էմմա Չոբանյանի
