07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ՄԻԵԴ-ը Ռուսաստանին մեղավոր է ճանաչել Malaysia Airlines-ի MH17 չվերթի կործանման մեջ
Քաղաքականություն
09.07.2025 | 19:23
Մարդու իրավունքների եվրոպական դատարանը (ՄԻԵԴ) որոշել է, որ Ռուսաստանն է կանգնած 2014 թվականին Դոնբասի վրայով Malaysia Airlines MH17 չվերթի կործանման հետևում, որի հետևանքով զոհվել է 298 մարդ, գրում է Meduza-ն։
Ըստ Associated Press-ի՝ սա առաջին դեպքն է, երբ միջազգային դատարանը Ռուսաստանին մեղավոր է ճանաչել MH17 ավիաաղետի համար։
Մեկ այլ որոշմամբ՝ ՄԻԵԴ-ը նշել է, որ Ռուսաստանը խախտել է միջազգային իրավունքը Ուկրաինայում պատերազմի ժամանակ: Սա առաջին դեպքն է, երբ միջազգային դատարանը Մոսկվային պատասխանատու է ճանաչել մարդու իրավունքների խախտումների համար 2022 թվականին Ուկրաինա լայնածավալ ներխուժման ժամանակ։
Դատարանն այս որոշումները կայացրել է Ռուսաստանի դեմ Ուկրաինայի և Նիդերլանդների կողմից հարուցված գործերը քննարկելիս։ AP-ն նշում է, որ ցանկացած որոշում հիմնականում խորհրդանշական բնույթ կունենա. 2022 թվականից ի վեր Ռուսաստանը չի կատարում դատարանի որոշումները։
Ռուսաստանը ՄԻԵԴ-ի որոշումները համարում է առ ոչինչ և չի պատրաստվում դրանք կատարել, հայտարարել է Ռուսաստանի նախագահի մամուլի քարտուղար Դմիտրի Պեսկովը։
Ամստերդամից Կուալա Լումպուր թռչող Malaysia Airlines-ի օդանավը խոցվել էր 2014 թվականի հուլիսի 17-ին՝ անջատողականների կողմից վերահսկվող արևելյան Ուկրաինայից արձակված ռուսական արտադրության «Բուկ»հրթիռով։ Բոլոր 298 ուղևորներն ու անձնակազմի անդամները, այդ թվում՝ Նիդերլանդների 196 քաղաքացի զոհվել էին։
2022 թվականի նոյեմբերին Նիդերլանդների դատարանը հեռակա կարգով ցմահ ազատազրկման էր դատապարտել ինքնահռչակ Դոնեցկի Ժողովրդական Հանրապետության նախկին պաշտպանության նախարար Իգոր Ստրելկովին ու ևս երկու անձի՝ ինքնաթիռը դիտավորյալ ոչնչացնելու և կանխամտածված սպանության մեղադրանքով։ Գործով մեկ այլ մեղադրյալ արդարացվել էր։
Թարգմանությունը՝ Էմմա Չոբանյանի
