Կարեն Կարագուլյանը և Վաչե Թովմասյանը կժամանեն Երևան, կքննարկեն «Անորան»

Հայ դերասաններ Կարեն Կարագուլյանը և Վաչե Թովմասյանը կժամանեն Հայաստան։ Նրանք այս տարի «Ոսկե ծիրան» միջազգային կինոփառատոնի շրջանակներում քննարկում կունենան՝ նվիրված «Անորա» ֆիլմին, որը մեծ հաջողություն բերեց դերասաններին։ «Ոսկե ծիրան» միջազգային կինոփառատոնի գեղարվեստական ղեկավար Կարեն Ավետիսյանն այսօր կայացած ասուլիսի ժամանակ տեղեկացրեց, որ քննարկմանը տեսակապով իր մասնակցությունը կունենա նաև «Անորայի» ռեժիսոր Շոն Բեյքերը։

«Անորա» ֆիլմի նկատմամբ հետաքրքրությունը բավական մեծ է, այդ է պատճառը, որ որոշեցինք կենդանի ֆորմատով քննարկում կազմակերպել Երևանում, լսելի դարձնել և՛ քննադատությունները, և՛ գովասանքները»։

Փառատոնի համահիմնադիր և նախագահ Հարություն Խաչատրյանի խոսքով՝ 22 տարի անընդմեջ «Ոսկե ծիրանը» կյանքի կոչելը հերոսություն է․ «Մեր ճանապարհը բարդ է եղել, բայց փառատոնը դարձել է բարի նշան․ նրանք, ովքեր այստեղից սկսել են իրենց ուղին, արժանացել են միջազգային բարձր գնահատականի»։ Միջազգային բաժնի ղեկավար Վարվարա Հովհաննիսյանն էլ նշեց, որ այս տարի մրցութային ծրագրերում մեծ տեղ է տրվել նաև հայկական ֆիլմերին՝ սկնակներից մինչև փորձառուներ․ «Կորիզ» կարճամետրաժ ֆիլմերի ծրագիրը ներկայացնելու է նորահայտ անուններ, իսկ տարածաշրջանային մրցույթը կբացի Քրիստինե Հարությունյանի «Երազելուց հետո» ֆիլմը, որի պրեմիերան տեղի է ունեցել Բեռլինում»։ Այս տարի «Ոսկե ծիրանը» կենտրոնացած կլինի հիմնականում իրանական կինոյի ուղղությամբ։ Հայաստանի ազգային պատկերասրահում կկազմակերպվի Աբբաս Քիառոստամիի լուսանկարների բացառիկ ցուցահանդեսը՝ նվիրված ռեժիսորի հիշատակին։ Փառատոնի հատուկ հյուրերից մեկը կլինի իրանցի հայտնի ռեժիսոր Ամիր Նադերին, մյուսը՝ Աֆրիկայի նշանավոր ռեժիսոր Աբդեռահման Սիսակոն, ով կղեկավարի միջազգային ժյուրին:

Հիշեցնենք՝ «Ոսկե ծիրան» 22-րդ միջազգային կինոփառատոնն այս տարի տեղի կունենա հուլիսի 13-20-ը։

Աննա Բաբաջանյան