Ինչ է հայտարարագրել անձեռնմխելիությունից զրկված պատգամավոր Արթուր Սարգսյանը

«Հայաստան» խմբակցության պատգամավոր Արթուր Սարգսյանը 2024 թվականին ստացել է 13․4 մլն դրամ եկամուտ, որից Ազգային ժողովից աշխատավարձը կազմել է 9 մլն դրամ, ՊԵԿ-ից հիփոթեքի եկամտահարկի վերադարձը՝ 1․9 մլն դրամ, «Ակբա բանկից» այլ եկամուտ՝ 2․3 մլն դրամ և 284 դոլար։

Կոռուպցիայի կանխարգելման հանձնաժողով ներկայացրած գույքի և եկամուտների հայտարարագրի համաձայն՝ Սարգսյանը 2023-ին Աշոտ Օրդուխանյանին 15․5 մլն դրամ փոխառություն էր տվել, որից 500 հազար դրամն անցած տարի ետ է ստացել։ Միաժամանակ, Սարգսյանն ինքն ստացել է 15 մլն դրամ փոխառություն՝ անտոկոս։ Թե ով է պատգամավորին նման պարտք տվել, հայտարարագրերում այդ տեղեկությունը հրապարակային չէ։

2024-ի տարեվերջին Սարգսյանը բանկային հաշիվներին ունեցել է մոտ 10 մլն դրամ և 4716 դոլար, կանխիկ՝ 11 մլն դրամ։ Հիփոթեքային վարկի մայր գումարի մնացորդը 2024-ի տարեվերջին կազմել է 49 հազար դոլար։

Նա ունի 2 բնակարան Երևանում, որոնցից մեկը Կենտրոնում համատեղ է, գնվել է 2022-ին «Գեվարգ» ՍՊԸ-ից՝ 28․3 մլն դրամով։ Պատգամավորը նաև միանձնյա ունի հասարակական ու արտադրական մեկական շինություն Սիսիանում։
Սարգսյանը վարում է 2019-ին գնված նույն տարվա արտադրության TOYOTA մակնիշի ավտոմեքենա։

Պատգամավորի կինը՝ Շուշան Հովհաննիսյանը, բացի Երևանում համատեղ բնակարանից, միանձնյա ունի 6 կտոր հողամաս Սյունիքի Վաղատին համայնքում, որոնք բոլորն էլ գնել է նույն օրը՝ 2011 թվականին։

Նա 508 դոլար և 411 հազար դրամ ավանդներ ունի ԱՄԻՕ բանկում, որտեղից էլ գոյացել է Հովհաննիսյանի միակ եկամուտը՝ 12 հազար դրամ։ Բանկային հաշիվներին պատգամավորի կինն ունեցել է մոտ 25 հազար դրամ, իսկ կանխիկ միջոցներ չի հայտարարագրել։

Ամուսինները չեն հայտարարագրել իրենց մասնակցությունն ընտանեկան բիզնեսում․ Շուշան Հովհաննիսյանը 41% բաժնետեր է «Լասա Եղբայրներ» ՍՊԸ-ում, որի 29%-ի բաժնետերը պատգամավորի հայրն է՝ Լավրենտ Սարգսյանը։ Ընկերությունը զբաղվել է մանրածախ առևտրով, ըստ ՊԵԿ-ի՝ ներկայում գործունեությունը ժամանակավոր դադարեցված է։
Հիշեցնենք, որ հուլիսի 8-ին ԱԺ իշխող խմբակցությունը բավարարեց ՀՀ դատախազի միջնորդությունները Արթուր Սարգսյանին պատգամավորական անձեռնմխելիությունից և ազատությունից զրկելու վերաբերյալ։

Գայանե Խաչատրյան