Քաղաքականություն
08.07.2025 | 14:43
Ռուսաստանի արտակարգ իրավիճակների նախարար Ալեքսանդր Կուրենկովը Բաքվում բանակցություններ է անցկացրել Ադրբեջանի իր պաշտոնակից Քյամալեդդին Հեյդարովի հետ։ Այս մասին ՏԱՍՍ-ին հայտնել են Ռուսաստանի արտակարգ իրավիճակների նախարարության մամուլի ծառայությունից։
«Ռուսաստանի ԱԻՆ ղեկավար Ալեքսանդր Կուրենկովը երկկողմ հանդիպում է անցկացրել Ադրբեջանի արտակարգ իրավիճակների նախարար Քյամալեդդին Հեյդարովի հետ։ Ռուսական գերատեսչության ղեկավարը երախտագիտություն է հայտնել Ադրբեջանին՝ Իրան-Իսրայել վերջին հակամարտության ժամանակ Իրանից Ռուսաստանի քաղաքացիների տարհանումը կազմակերպելու համար»,- հայտնել են մամուլի ծառայությունից։
Հաղորդվում է, որ նախարարները քննարկել են արտակարգ իրավիճակների ծառայությունների միջև երկկողմ գործընկերությունը և նշել Ադրբեջանի ներդրումը Միջազգային քաղաքացիական պաշտպանության կազմակերպության զարգացման գործում, որի 58-րդ նիստը տեղի է ունենում Բաքվում։
«Այս ուղղությամբ համատեղ աշխատանքն ապացուցում է արտակարգ ծառայությունների գծով միջազգային համագործակցության մեջ փոխօգնության և փրկության ազնիվ գործի առաջնահերթության մասին»,- ասվում է հաղորդագրության մեջ։
Հիշեցնենք, որ Կուրենկովը Բաքու է ժամանել նախօրեին, երկու երկրների միջև լարված հարաբերությունների պայմաններում։ Ավելի վաղ ՌԴ ուժայիններին մոտ կանգված ВЧК-ОГПУ տելեգրամ ալիքի աղբյուրը հայտնել էր, որ Մոսկվայում պատրաստվել է պատվիրակություն, որը ոչ պաշտոնական այցով կմեկնի Բաքու՝ երկու երկրների միջև հակամարտությունը լուծելու նպատակով։ Ադրբեջանի նախագահ Իլհամ Ալիևին կփոխանցվի ՌԴ նախագահ Վլադիմիր Պուտինի ուղերձը, կարող է ձերբակալվածների «փոխանակման» առաջարկ արվել։
Թարգմանությունը՝ Էմմա Չոբանյանի
