Չինաստանը կարող է խնդրել Ռուսաստանին հարձակվել ՆԱՏՕ-ի վրա․ Ռյուտե

ՆԱՏՕ-ի ղեկավար Մարկ Ռյուտեն չի բացառել, որ Ռուսաստանը կարող է հարձակվել դաշինքի տարածքի վրա՝ Չինաստանի խնդրանքով։

«Եթե Չինաստանը որոշի ուժ կիրառել Թայվանի նկատմամբ, ապա ՉԺՀ առաջնորդ Սի Ծինփինը կարող է խնդրել Ռուսաստանի նախագահ Վլադիմիր Պուտինին՝ Եվրոպացիների ուշադրությունը շեղել Հնդկա-Խաղաղօվկիանոսյան տարածաշրջանում տիրող իրավիճակից՝ հարձակվելով ՆԱՏՕ-ի տարածքի վրա»,-նշել է նա The New York Times-ին տված հարցազրույցում, որը հրապարակվել է շաբաթ օրը՝ հուլիսի 5-ին։

Ռյուտեի խոսքով՝ նման սցենարի հավանականությունը գնալով աճում է։ Այդ առնչությամբ նա նշել է երկու հիմնական քայլի անհրաժեշտությունը Պեկինին և Մոսկվային զսպելու համար։ Առաջինը վերաբերում է արևմտյան դաշինքի հավաքական ամրապնդմանը, «որպեսզի ռուսները երբեք չհարձակվեն»։ Երկրորդ պարտադիր քայլը Ռյուտեն անվանել է Հնդկա-Խաղաղօվկիանոսյան տարածաշրջանի հետ համատեղ աշխատանքը՝ պաշտպանության արդյունաբերության և նորարարությունների ոլորտում։ Այս համագործակցությունը ակտիվորեն խթանում է ԱՄՆ վարչակազմը՝ նախագահ Դոնալդ Թրամփի գլխավորությամբ, ընդգծել է Ռյուտեն։

«Մեր առաջ կանգնած է հսկայական աշխարհաքաղաքական մարտահրավեր։ Եվ դա նախևառաջ վերականգնվող Ռուսաստանն է, որն անհավատալի արագությամբ է վերազինվում՝ առանց նախադեպի ժամանակակից պատմության մեջ։ Այժմ նրանք երեք ամսում երեք անգամ ավելի շատ զինամթերք են արտադրում, քան ՆԱՏՕ-ի բոլոր անդամները՝ միասին վերցրած՝ մեկ տարում»,-պնդել է դաշինքի գլխավոր քարտուղարը։