07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Ինչ սպիտակ փոշենման զանգված են ստիպողաբար տվել երեխաներին. փորձաքննությունն ավարտվել է
Հասարակություն
04.07.2025 | 17:15
Արարատի մարզի Մխչյան գյուղի Քրիստափոր Ալավերդյանի անվան դպրոցի աղմկահարույց միջադեպով փորձագիտական եզրակացությունը պատրաստ է։ Ինչպես Factor TV-ի հարցմանն ի պատասխան հայտնեցին Քննչական կոմիտեից, անչափահասների մոտ ոչ մի տեսակի թմրամիջոցի օգտագործման հետքեր չեն հայտնաբերվել։ Կոմիտեից այս պահին այլ մանրամասներ չեն հաղորդում, քանի որ գործով նախաքննությունը դեռ շարունակվում է։ Թե ինչի դիմաց էր ենթադրյալ շորթում կատարվել անչափահասներից, պարզ կդառնա քննությունից հետո։
Հիշեցնենք՝ մայիսի 14-ին ահազանգեր ստացվեցին, որ դպրոցում բարձր դասարանի աշակերտները սանհանգույց են մտցրել 4-րդ դասարանի երկու աշակերտի և ստիպողաբար նրանց բերանը սպիտակ փոշենման զանգված լցրել։ FactorTV-ին ահազանգած ծնողը հայտնել էր, որ, իբր, երեխաներին թմրանյութ են տվել՝ փոխարենը պահանջելով գումար, որը ցածր դասարանի աշակերտները ծնողներից թաքուն վերցրել են տնից՝ թմրանյութը նորից գնելու ակնկալիքով։
Նախնական տեղեկությունների համաձայն՝ սպիտակ փոշենման զանգվածն առաջին անգամ երեխաներին տվել են 2024 թվականի դեկտեմբերին, որը շարունակվել է մինչև 2025-ի ապրիլ։
Մայիսի 12-ին Քննչական կոմիտեում քրեական վարույթ է նախաձեռնվել Քրեական օրենսգրքի 258-րդ հոդվածի 2-րդ մասի 2-րդ, 5-րդ, 8-րդ կետերով՝ շորթում, որը կատարվել է մի խումբ անձանց կողմից նախնական համաձայնությամբ անօգնական վիճակում գտնվողի, անչափահասի նկատմամբ։ Երեք անչափահասի և մեկ չափահասի նկատմամբ հարուցվել է հանրային քրեական հետապնդում՝ անչափահասների մասով, վարչական հսկողություն, իսկ չափահասի նկատմամբ տնային կալանք է ընտրվել։ Տուժող են ճանաչվել ցածր դասարանի երկու երեխաներ։
Թմրանյութերի մասով որևէ մեղադրանք առաջադրված չէր, քանի որ սպիտակ փոշենման զանգվածը փորձաքննության էր ուղարկվել։
Հիշեցնենք, որ աղմկահարույց միջադեպից հետո ազատման դիմում էր ներկայացրել դպրոցի տնօրեն Քաղցրիկ Մաթևոսյանը։
Ռոզա Վարդանյան
