29.04.2026 | 13:27
Ավանեսյանը՝ Բաքվում պահվող գերիների առողջական վիճակի և ադրբեջանական պատվիրակության այցի մասին․ ՏԵՍԱՆՅՈՒԹ
Բացահայտվել է Լոռու մարզում կատարված ավազակության դեպքը. 2 անձ կալանավորվել է
Հասարակություն
04.07.2025 | 17:07
ՀՀ քննչական կոմիտեն մանրամասներ է հայտնում այս տարվա մարտի 14-ին Վանաձորում տեղի ունեցած ավազակության դեպքից։
ՔԿ-ի հաղորդագրությունը՝ ստորև․
«ՀՀ քննչական կոմիտեի Լոռու մարզային քննչական վարչությունում նախաձեռնված քրեական վարույթի նախաքննության ընթացքում ձեռնարկված քննչական գործողությունների, ինչպես նաև ՆԳՆ աշխատակիցների կողմից համատեղ իրականացված պլանավորված և հետևողական աշխատանքների արդյունքում ձեռք են բերվել առերևույթ փաստական տվյալներ, որ 2025 թվականի մարտի 14-ին երկու անձ ապօրինի մուտք են գործել Վանաձոր քաղաքի բնակչուհի Ք.Բ.-ի բնակարան, ատրճանակները պահել են վերջինիս և նրա անչափահաս երեխայի ուղղությամբ, ապա ատրճանակի սպառնալիքով պահանջել են ոսկյա զարդեր և գումար, որից հետո Ք.Բ.-ն ննջասենյակից վերցրել և զարդատուփով նրանց է փոխանցել 7 հատ ոսկյա զարդ:
Քրեական վարույթի նախաքննության ընթացքում Տ.Ու.-ի և Գ.Պ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 46-252-րդ հոդվածի 3-րդ մասի 2-րդ կետով (ավազակությանն օժանդակելը), Գ.Մ.-ի նկատմամբ՝ 252-րդ հոդվածի 3-րդ մասի 2-րդ կետով (ավազակությունը) և 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը)։
Տ.Ու.-ի և Գ.Պ.-ի նկատմամբ որպես խափանման միջոց կիրառվել է կալանքը:
Կատարվում են անհրաժեշտ քննչական գործողություններ՝ ազատության մեջ գտնվող Գ.Մ.-ին հայտնաբերելու և նրա նկատմամբ կալանքը որպես խափանման միջոց կիրառելու վերաբերյալ:
Նախաքննությունը շարունակվում է։
Հիշեցնենք, որ ավելի վաղ Տ.Ու-ի փաստաբան Ռ.Ե.-ն հավաք էր կազմակերպել ի պաշտպանություն իր պաշտպանյալի՝ ներկայացնելով, թե իբր Տ.Ու-ն հանիրավի էր կասկածվում ավազակային հարձակում կատարելու մեջ»:
Հիշեցնենք, որ Վանաձորի բնակարաններից մեկում տեղի ունեցած գողության դեպքից հետո Տիգրան Ուլուբաբյանը կանչվել էր ոստիկանություն։ Ըստ Ուլուբաբյանի պատմածի՝ Վանաձորում բնակվող իր բարեկամներից մեկի տնից գողություն է կատարվել, ինքը բարեկամուհուն ուղեկցել է Ոստիկանություն, որից հետո իրեն կանչել են վարչություն ու ծեծի միջոցով ստիպել խոստովանել, որ ինքն է կազմակերպել գողությունը։ Ուլուբաբյանը, սակայն, չի խոստովանել, ազատ է արձակվել ու բարձրաձայնել իր նկատմամբ խոշտանգման մասին։ Դեպքը տեղի է ունեցել 2025-ի մարտի 14-ին։ Ավելի, քան երեք ամիս անց, փաստորեն, վարույթն իրականացնող մարմինը հայտնում է այն մասին, որ Ուլուբաբյանին գործով մեղադրանք է ներկայացվել։
