16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
«Տաշիր գրուպ»-ի խուզարկություններից հետո 2 անձ կալանավորվել է, ևս 2-ի մասով՝ կալանքի միջնորդություն ներկայացվել
Հասարակություն
03.07.2025 | 15:08
Գործարար Սամվել Կարապետյանին պատկանող «Տաշիր գրուպ»-ում երեկ կատարված խուզարկություններից հետո 4 անձի նկատմամբ հարուցվել է հանրային քրեական հետապնդում՝ Քրեական օրենսգրքի 296-րդ հոդվածի 3-րդ մասի 3-րդ կետով (առանձնապես խոշոր չափերով փողերի լվացում): Նրանցից երկուսը կալանավորվել են, ևս երկուսի մասով կալանքի միջնորդություն է ներկայացվել դատարան։ Այս մասին Factor TV-ի հարցմանն ի պատասխան հայտնեցին Քննչական կոմիտեից։
Իրավապահ կառույցն այս պահին զերծ է մնում այլ մանրամասներ հայտնելուց, սակայն Factor TV-ի աղբյուրների հաղորդմամբ՝ նրանցից մեկը խմբի մեջ մտնող ընկերություններից մեկի տնօրենն է, մյուսը՝ անշարժ գույքի գործակալ։
Հիշեցնենք՝ երեկ առավոտից խուզարկություններ էին իրականացվում գլխամասային գրասենյակում։ Ինչպես Factor TV-ին հայտնել էին կոմիտեից՝ տնտեսական հանցագործությունների և մաքսանենգությունների քննության գլխավոր վարչությունում առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի նախաքննության ընթացքում «Տաշիր գրուպի» գլխավոր գրասենյակում իրականացվում են անհետաձգելի քննչական գործողություններ:
Ռոզա Վարդանյան
