21.02.2026 | 10:49
Արտարժույթների փոխարժեքները՝ փետրվարի 21-ի դրությամբ
Էրդողանը կարծում է, որ Թեհրանը չի փակի Հորմուզի նեղուցը
Քաղաքականություն
26.06.2025 | 17:37
Թուրքիայի նախագահ Ռեջեփ Թայիփ Էրդողանը Հաագայից վերադառնալիս ինքնաթիռում լրագրողների հետ զրույցում անդրադարձել է Իրանի կողմից Հորմուզի նեղուցի հնարավոր փակման հարցին։
«Հորմուզի նեղուցի փակումը մեծ խնդիրներ կառաջացնի։ Մենք կարծում ենք, որ Իրանը նման քայլի չի դիմի: Վերջին լարվածությունը մեզ կրկին հիշեցրեց, թե որքան կարևոր է էներգետիկ անվտանգությունը»,-ասել է նա։
Էրդողանը շեշտել է, որ Թուրքիան ամեն ինչ անում է սեփական էներգետիկ պաշարները մեծացնելու համար՝ ասելով, որ դրանք արդյունահանում են բազմաթիվ վայրերում՝ Գաբարի նավթից մինչև Սև ծովի բնական գազ, և որ իրենք փորձում են մեծացնել այդ պաշարները։
«Մենք աշխատում ենք կրճատել մեր ներմուծումը և ավելացնել մեր արտադրությունը՝ էներգետիկայի ոլորտում լիովին անկախ դառնալու նպատակով։ Մեր վերջնական նպատակն է Թուրքիան դարձնել ռեսուրսների և տեխնոլոգիաների արտահանող երկիր։Տեղի ունեցածը հստակ ցույց տվեց, որ էներգետիկան երկրների գոյատևման հարց է։ Երկու օր առաջ լուր տարածվեց։ Նրանք ասացին. «Իրանը կտրել է բնական գազի մատակարարումը»։ Ես անմիջապես քննարկեցի այս հարցը իմ էներգետիկայի նախարարի հետ, որը կապ է հաստատել իր գործընկերոջ հետ»,-ասել է Թուրքիայի նախագահը՝ հավելելով, որ իրականում նման իրավիճակ չկա։
«Մենք նաև զրուցել ենք Իրանի նախագահ Փեզեշքիանի հետ։ Մենք նույնիսկ չենք քննարկում այնպիսի իրավիճակի հնարավորությունը, ինչպիսին է մեր բնական գազի մատակարարման դադարեցումը։ Այս պահին մեր բնական գազը գալիս է Իրանից։ Մենք որևէ խնդիր չունենք»,-նշել է Էրդողանը։
Հիշեցնենք, որ Իրանի ու Իսրայելի միջև ռազմական գործողությունների ֆոնին՝ իրանական լրատվամիջոցները հայտնել էին, որ Իրանի Ազգային անվտանգության գերագույն խորհուրդը պետք է վերջնական որոշում կայացնի նեղուցը փակելու վերաբերյալ, այն բանից հետո, երբ հաղորդվել էր, որ խորհրդարանը կողմ է այդ միջոցառմանը։
Նավթի և գազի համաշխարհային տարանցման մոտ 20%-ն իրականացվում է հենց այս նեղուցով։
Թարգմանությունը՝ Էմմա Չոբանյանի
