14.07.2026 | 21:37
Վահագն Խաչատուրյանը մի շարք օրենքներ է ստորագրել
ՄԻՊ-ը Բագրատ Գալստանյանի ու նրա կողմնակիցների տներում խուզարկությունների և ձերբակալությունների վերաբերյալ տեղեկատվություն է պահանջել իրավասու մարմնից
26.06.2025 | 13:44
Հունիսի 25-ի քրեական վարույթի շրջանակում իրականացված խուզարկությունների և ձերբակալությունների վերաբերյալ զանգվածային լրատվության միջոցների և սոցիալական ցանցերի հրապարակումները Մարդու իրավունքների պաշտպանի աշխատակազմում ուսումնասիրվում են։ Տեղեկությունը Factor.am-ին փոխանցեց ՄԻՊ մամուլի խոսնակ Արթուր Ասլանյանը։
Նրա խոսքով՝ վարույթին առնչվող հարցերի վերաբերյալ տեղեկատվություն է պահանջվել իրավասու մարմնից: «Իրավունքների խախտումների վերաբերյալ դիրքորոշման առկայության դեպքում հանդես կգանք հրապարակային», – ընդգծել է Ասլանյանը։
Հիշեցնենք, որ երեկ վաղ առավոտից խուզարկություններ էին սկսվել «Սրբազան պայքարի» ղեկավար Բագրատ Գալստանյանի և նրա համակիրների բնակարաններում։ Արդեն կեսօրին իր կեցավայրից բերման էր ենթարկվել Գալստանյանը, ավելի ուշ հայտնի դարձավ, որ նրան մեղադրանք է առաջադրվել ահաբեկչություն նախապատրաստելու, զանգվածային անկարգություններ հրահրելու հոդվածներով։ Ապա ՔԿ-ն հրապարակեց գաղտնի քննչական գործողությունների արդյունքում ձեռք բերված ձայնագրությունները։
«Սրբազան պայքար» շարժման ղեկավար Բագրատ Գալստանյանը 2 ամսով կալանավորվել է։ Նրա փաստաբան Հովհաննես Խուդոյանը հայտնել է, որ որոշումը բողոքարկելու են։
Անի Թամրազյան
