07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Հայտնաբերվել են փողոցում էլեկտրասնուցման և համացանցային կապի ապահովման լարերը վնասելու համար նախատեսված մեծաքանակ հրավտանգ առարկաներ․15 անձ կալանավորվել է․ ՔԿ
Հասարակություն
26.06.2025 | 12:26
ՀՀ քննչական կոմիտեից տեղեկացնում են, որ խուզարկությունների արդյունքում հայտնաբերվել են փողոցում էլեկտրասնուցման և համացանցային կապի ապահովման լարերը վնասելու համար նախատեսված մեծաքանակ հրավտանգ առարկաներ։
ՔԿ-ից տեղեկացնում են, որ «Սրբազան պայքար» շարժման ղեկավարների ու մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքի վերաբերյալ քրեական վարույթի նախաքննության շրջանակներում շարունակված խուզարկությունների արդյունքում դարձյալ հայտնաբերվել են մեղադրյալներին մեղսագրված գործողությունները հաստատող իրեր, այդ թվում՝ փողոցում էլեկտրասնուցման և համացանցային կապի ապահովման լարերը վնասելու համար նախատեսված մեծաքանակ հրավտանգ առարկաներ:
«Կալանքը որպես խափանման միջոց ընտրելու վերաբերյալ դատարան ներկայացված բոլոր միջնորդությունները բավարարվել են: 15 մեղադրյալներ կալանավորված են»,- նշված է ՔԿ հաղորդագրության մեջ:
Հիշեցնենք, որ երեկ վաղ առավոտից խուզարկություններ էին սկսվել «Սրբազան պայքարի» ղեկավար Բագրատ Գալստանյանի և նրա համակիրների բնակարաններում։ Արդեն կեսօրին իր կեցավայրից բերման էր ենթարկվել Գալստանյանը, ավելի ուշ հայտնի դարձավ, որ նրան մեղադրանք է առաջադրվել ահաբեկչություն նախապատրաստելու, զանգվածային անկարգություններ հրահրելու հոդվածներով։
Ապա ՔԿ-ն հրապարակեց գաղտնի քննչական գործողությունների արդյունքում ձեռք բերված ձայնագրությունները։
«Պիտի երկիրը քաոս դառնա, ոստիկանությունը ասեց չենք կարա, մանթրաշ կլինի, չի ստացվի ուղղակի, ծուխերից սկսած, սալյուտներից ու ռուբերից վերջացրած»,- մասնավորապես ասված է Բագրատ Գալստանյանին վերագրվող ձայնագրություններից մեկում։
«Սրբազան պայքար» շարժման ղեկավար Բագրատ Գալստանյանը 2 ամսով կալանավորվել է։ Նրա փաստաբան Հովհաննես Խուդոյանը հայտնել է, որ որոշումը բողոքարկելու են։ Գալստանյանին մեղադրանք է առաջադրված ահաբեկչության նախապատրաստման և զանգվածային անկարգությունների հրահրման համար։
Երկու ամսով կալանավորվել են նաև պահեստազորի գնդապետ Միհրան Մախսուդյանը, Արցախի Հանրապետության ԱԺ պատգամավոր Դավիթ Գալստյանը, Գալստանյանի օգնական Մովսես Շարբաթյանը, Արմեն Ալեքսանյանը։
Ըստ Քննչական կոմիտեի` Գալստանյանի առաջնորդած «Սրբազան պայքարի» շարժման մասնակիցները և ղեկավարները «պլանավորել էին Հայաստանում իրականացնել ահաբեկչական և իշխանությունը զավթելուն ուղղված գործողություններ»:
