23.05.2026 | 18:52
«Ուժեղ Հայաստան» կուսակցության քարոզարշավը Արմավիրի մարզում. ՈՒՂԻՂ
«Իգլա» գտե՞լ են. Գառնիկ Դանիելյանը` ՔԿ-ի հաղորդագրության մասին․ ՏԵՍԱՆՅՈՒԹ
Քաղաքականություն
25.06.2025 | 11:19
Ազգային անվտանգության ծառայությունը խուզարկում է Բագրատ արքեպիսկոպոս Գալստանյանի կեցավայրը։ Այնտեղ են նաև ԱԺ ընդդիմադիր խմբակցությունների պատգամավորները։ «Հայաստան» խմբակցության պատգամավոր Գառնիկ Դանիելյանը լրագրողների հետ զրույցում ասաց, որ «իշխանությունը հատել է բոլոր կարմիր գծերը»։
«Տվյալները թարմացվում են։ Մեր մարզային կառույցների պատասխանատուներին են տարել ԱԱԾ։ Քիչ առաջ ասացին, որ Լիդյա Մանթաշյանին են տարել Քննչական, սրբազանի օգնականին, «Որդիների կանչ» հասարակական կազմակերպության նախագահ Արա Ռոստոմյանին։ Նոր տեղեկություններ ենք ստանում, որ պատգամավոր Արթուր Սարգսյանի բնակարանն են խուզարկում»,- տեղեկացրեց Դանիելյանը։
Պատգամավորի խոսքով՝ Նիկոլ Փաշինյանը ընդդիմադիր հայացքներ ունեցող ցանկացած անձի հետևից պատրաստ է գնալ։
«Էս մարդը պատկերացնում է, որ ինքը էս երկրի և՛ դատավորն է, և՛ դատախազը, և՛ քրեականի պետը, հիմա էլ վեհարանի վրա աչք ունի։ Փորձել է վախեցնել, տեսել է չի ստացվում, հիմա էլ ԱԱԾ-ին է ներգրավել»,- նշեց Գառնիկ Դանիելյանը։
Factor TV-ի հարցին, թե Քննչական կոմիտեն Բագրատ Գալստանյանի գլխավորությամբ ահաբեկչական գործողություններ իրականացնելու պլաններ է թվարկում, այդ թվում՝ երկրում վախ մթնոլորտ ստեղծելու մասին է հայտնում, Դանիելյանը հեգնեց․
«Կարող էին ավելացնել, որ Քենեդու սպանության մեջ էլ է մասնակից սրբազանը։ «Իգլա» գտե՞լ են, ինչ-որ բան գտե՞լ են, ուղղաթիռ, հրթիռ գտե՞լ են»։
Հիշեցնենք, որ այսօր առավոտյան Քննչական կոմիտեն հաղորդագրություն էր տարածել «Սրբազան պայքար» անվանումով շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։
Մանրամասները՝ տեսանյութում։
