Իսրայելի երեկվա հարվածներից Իրանի հետախուզական ուժերի հրամանատար և ոստիկանության բարձրաստիճան պաշտոնյա է զոհվել

Իրանական լրատվամիջոցները հաղորդում են, որ երեկ Իսրայելի հարվածից սպանվել է Իրանի «Բասիջ» ռազմականացված ուժերի ավագ հրամանատար, որը կապված է Իսլամական հեղափոխության պահապանների կորպուսի (ԻՀՊԿ) հետ, գրում է Al Arabiya-ն։

«Բասիջի հակահետախուզական պաշտպանության ուժերի հրամանատարը նահատակվել է սիոնիստական ​​ռեժիմի հարձակման ժամանակ», – հայտնել է Fars լրատվական գործակալությունը՝ հղում անելով ԻՀՊԿ-ի հայտարարությանը։ Բացի այդ՝ իրանական լրատվամիջոցները հաղորդել են, որ Իրանի միջուկային ծրագրին մասնակցող բարձրաստիճան անձ Մոհամմադ-Ռեզա Սեդիղի Սաբերը զոհվել է Իսրայելի կողմից  իր տանը հասցված հարվածի հետևանքով Աստանե Աշրաֆիե քաղաքում։

Իրանական լրատվամիջոցների կողմից տարածված տեսանյութերում երևում է, թե ինչպես են փրկարարները մաքրում  տան փլատակները։

Նշվում է, որ հարվածը տեղի է ունեցել երեքշաբթի վաղ առավոտյան։ Մի քանի օր առաջ Իսրայելը, ենթադրաբար, թիրախավորել էր նրա անձնական նստավայրը Թեհրանում։

Իրանական ԶԼՄ-ները նաև հաղորդում են, որ Իսրայելի կողմից իրականացված հարվածի հետևանքով զոհվել է Իրանի իրավապահ մարմինների հետախուզության կազմակերպության փոխղեկավար Ալիռեզա Լոտֆին։ Լոտֆին զոհվել է երկուշաբթի օրը Թեհրանում տեղի ունեցած հարձակումների ժամանակ։

Իսրայելը պնդում է, որ երկուշաբթի օրը Թեհրանում բազմաթիվ թիրախների վրա համակարգված հարվածների արդյունքում զոհվել են Իրանի Իսլամական հեղափոխության պահապանների կորպուսի հարյուրավոր անդամներ։

Իրանի առողջապահության նախարարն էլ հայտարարել է, որ հունիսի 13-ից ի վեր Իսրայելի կողմից իրականացված հարվածների հետևանքով զոհվել է 606 մարդ։

Մուհամմադ Ռեզա Զաֆարղանին ասել է, որ ավելի քան 5000 մարդ վիրավորվել է և բժշկական օգնություն է ստանում։ Նա նշել է, որ Իրանը վերջին 24 ժամվա ընթացքում ենթարկվել է  ամենավատ հարձակումներին, որոնց հետևանքով զոհվել է 107 մարդ։