Թրամփը շնորհակալություն է հայտնել Իրանին ԱՄՆ-ի ռազմաբազային հարվածելու մասին նախազգուշացման համար

ԱՄՆ նախագահ Դոնալդ Թրամփը գրառում է կատարել՝ նշելով, որ Իրանի հարվածներից վնասը նվազագույն է եղել, ոչ մի ամերիկացի չի տուժել:

«Ուրախ եմ տեղեկացնել, որ բացի նրանից, որ ոչ մի ամերիկացի չի սպանվել կամ վիրավորվել, ինչը շատ կարևոր է, Կատարի ոչ մի բնակիչ նույնպես չի սպանվել կամ վիրավորվել»,- Truth Social-ում գրել է ԱՄՆ նախագահ Թրամփը:

Նա նաև հաստատել է, որ Իրանը նախազգուշացրել է Վաշինգտոնին առաջիկա հարձակման մասին: Թրամփը նաև շնորհակալություն է հայտնել Թեհրանին նախնական նախազգուշացման համար, որը թույլ է տվել խուսափել զոհերից:

«Ես ցանկանում եմ շնորհակալություն հայտնել Իրանին, որ նա մեզ նախապես զգուշացրել է, ինչը թույլ է տվել խուսափել զոհերից և վիրավորներից։ Հնարավոր է՝ Իրանն այժմ կարողանա շարժվել դեպի խաղաղություն և ներդաշնակություն տարածաշրջանում, և ես խանդավառությամբ կոչ եմ անում Իսրայելին անել նույնը»,- գրել է ԱՄՆ նախագահը։

Հիշեցնենք՝ հունիսի լույս 22-ի գիշերը ԱՄՆ-ը հարվածներ է հասցրել Իրանի Նաթանզում, Ֆորդոյում և Սպահանում գտնվող միջուկային օբյեկտներին: Դրան նախորդել էր Իսրայելի մեկշաբաթյա ռազմական գործողությունը, որը մեկնարկել էր հունիսի 13-ից։ Նպատակը Թեհրանի՝  միջուկային ծրագրի շուրջ աշխատանքի խաթարումն էր: Ի պատասխան՝ Իրանը սկսել է հարվածներ հասցնել Իսրայելի տարածքին, իսկ ամերիկյան հարվածներից հետո այսօր երեկոյան հարձակվել է Կատարում գտնվող ԱՄՆ ռազմաբազայի վրա:

Ավելի վաղ Կատարի իշխանությունները հայտնել էին, որ ԱՄՆ-ի վերահսկողության տակ գտնվող ռազմաբազան հասցրել են նախապես տարհանել։