Իսրայելից տարհանվելու հարցով հայերը դիմել են դեսպանատուն․ ՀՀ-ն տարհանում չի իրականացրել

Իրանից քաղաքացիների հոսքը չի տարբերվում նախորդ տարվա ծավալից։ Այս մասին Factor TV-ի հետ զրույցում ասել է Սփյուռքի գործերի գլխավոր հանձնակատար Զարեհ Սինանյանը՝ անդրադառնալով հարցին, թե իրանա-իսրայելական պատերազմով պայամանվորված քանի քաղաքացի է եկել ՀՀ։

«Մենք ունենք անհատներ, որոնք եկել են ՀՀ-ում անվտանգ ապաստան գտնեն ժամանակավորապես, բայց այդ թիվը մեծ չէ։ Մարդիկ գալիս են, քանի որ ՀՀ-ում տուն ունեն, քաղաքացիություն ունեն, գալիս են նաև մարդիկ, որոնք տեղում որոշում են, թե ինչ են անելու»,-ասաց հանձնակատարը։

Սինանյանի փոխանցմամբ՝ պատերազմի 11 օրերի ընթացքում ՀՀ կառավարությանը կացարանով ապահովելու հարցով մեկ ընտանիք է դիմել։

«Երեկ մեզ դիմեց մի ընտանիք՝ հինգ հոգուց բաղկացած, ասացին, որ կացարանի կարիք ունեն, կարճաժամկետ լուծել ենք այդ խնդիրը։ Ընդհանրապես եկողների մեծ մասը Իրանի քաղաքացիներ են, բայց մեզ չեն դիմում, ինքնաբավ են»,-ասաց նա։
Խոսելով Իսրայելում ապրող հայերի մասին Զարեհ Սինանյանը տեղեկացրեց, որ դեսպանատանը կա մինչ 10 անձի ցուցակ, որոնք ցանկացել են, որ ՀՀ-ն իրենց տարհանի Իսրայելի տարածքից։

«Չի կազմակերպվել նրանց դուրս գալը, իրենք նախ պետք է ցույց տան, թե ինչու իրենք չեն կարողանում դուրս գալ։ Այս առումով Իսրայելն ավելի շատ ապահով վիճակում է քան Իրանը։ Օդային դարպասը փակ է, բայց ակտիվ ցամաքային կապ ունեն հարևան երկրների հետ, թե՛ Հորդանանի, թե՛ Եգիպտոսի, թե՛ Կիպրոսի հետ ծովային։ Իսրայելից դուրս գալը նույն խնդիրները չի առաջացնում, ինչ Իրանից։ Այս պահին տարհանման հարց չի բարձրացել»,-ասաց նա։

Նարեկ Կիրակոսյան