Արտակ Գալստյանին զրկել մանդատից․ ավագանու անդամը որոշման նախագիծ է ներկայացրել

Երևանի ավագանու «Ազգային առաջընթաց» խմբակցության անդամ Հայկ Գրիգորյանն առաջարկում է վաղաժամկետ դադարեցնել «Հանրային ձայն» խմբակցության անդամ Արտակ Գալստյանի լիազորությունները։ Համապատասխան նախագիծն ընդգրկված է ավագանու՝ վաղը կայանալիք նիստի օրակարգում։

Գրիգորյանը նախագծի հիմնավորման մեջ նշել է, որ Գալստյանը չի ներկայացել ավագանու բոլոր՝ հերթական և արտահերթ թվով 17 նիստերից 17-ին, այն դեպքում, երբ ավագանու անդամը պարտավոր է մասնակցել նիստերին։

Հայկ Գրիգորյանը նաև նշել է, որ Արտակ Գալստյանը, հանդիսանալով Երևանի ավագանու իրավական հարցերի մշտական հանձնաժողովի անդամ, ավագանու անդամի լիազորությունները ստանձնելուց հետո բացակայել է հանձնաժողովի բոլոր՝ թվով 11 նիստերից 11-ից:

«Օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից: Համաձայն Երևան քաղաքի ավագանու 26 հոկտեմբերի 2021թ. N 454-Ա որոշման 4-րդ կետի` Երևան քաղաքի ավագանու հերթական նիստից անհարգելի բացակայություն է համարվում, եթե ավագանու անդամը չի մասնակցել նիստի օրակարգում ընդգրկված հարցերի քվեարկությունների գրանցումների ավելի քան կեսին»,- նշված է նախագծի հիմնավորման մեջ։

Ընդգծենք, որ Արտակ Գալստյանը տնային կալանքի մեջ է և դա է պատճառը, որ նա չի ներկայանում նիստերին։

Հայկ Գրիգորյանը նկատում է, որ այդ պարագայում օրենքով նախատեսված որևէ հիմք՝ բացատրությունը հարգելի համարելու համար առկա չէ։

Երևանի ավագանին՝ ՔՊ խմբակցության նախաձեռնությամբ, ավագանու մի քանի անդամների լիազորությունները վաղաժամկետ դադարեցրել է նույն՝ նիստերին չներկայանալու հիմքով։ Ավագանու անդամները եղել են ընդդիմադիր «Ազգային առաջընթաց» և «Մայր Հայաստան» խմբակցություններից։ Նրանց թվում էր նաև Երևանի նախկին քաղաքապետ Հայկ Մարությանը։

Արփի Հակոբյան