13.01.2026 | 15:55
Պարգևավճար ստացել եմ, բայց Ձեր նշած թվերը չեմ ստացել. Սուրեն Պապիկյան․ ՏԵՍԱՆՅՈՒԹ
Ըստ ՌԴ ԱԴԾ-ի՝ «Ալռոսա» ընկերությունից ադամանդները մատակարարվել են Խաչատուր Սուքիասյանի ընկերությանը․ պատգամավորի խոսնակը հերքում է
Քաղաքականություն
23.06.2025 | 12:29
«Ալռոսայից» գողացված ադամանդները հանձնվել են մի ընկերության, որի շահառուն գործարար, ՀՀ խորհրդարանի պատգամավոր Խաչատուր Սուքիասյանն է․ հայտնել է ՌԴ ԱԴԾ հասարակայնության հետ կապերի կենտրոնը։ Ավելի վաղ Ռուսաստանի Դաշնության քննչական կոմիտեի պաշտոնական ներկայացուցիչ Սվետլանա Պետրենկոն «ՌԻԱ Նովոստի»-ին հայտնել էր, որ անվտանգության ուժերը ձերբակալել են մի ավազակախմբի, որը «Ալռոսա» ադամանդի արդյունահանման ընկերությունից գողացել է ադամանդի հումք՝ Հայաստան մաքսանենգ ճանապարհով տեղափոխելու համար, և որ ձերբակալվածների թվում է ընկերության աշխատակիցը։
Նա նշել է, որ խուզարկությունների ժամանակ ավազակախմբից առգրավվել է մոտ 200 հազար կարատ արդյունաբերական ադամանդ, փող և զարդեր։
«Նրանց տան խուզարկության ժամանակ առգրավվել են քրեական գործի քննության համար կարևոր իրեր և փաստաթղթեր, մոտ 200 հազար կարատ արդյունաբերական ադամանդի հումք, որը նախատեսված է բարձրորակ հումքն ավելի էժանով փոխարինելու համար, ինչպես նաև կանխիկ գումար և հայտնի համաշխարհային ապրանքանիշերի թանկարժեք զարդեր, որոնք ձեռք են բերվել անօրինական գործունեության մասնակիցների կողմից հանցագործություններ կատարելու արդյունքում», – ասել է Պետրենկոն։
Նշվում է նաև, որ ««անօրինական գործունեության կազմակերպիչներն են եղբայրներ՝ Հայաստանի քաղաքացիներ Բաղիկյան Ա.Ա.-ն և Բաղիկյան Ա.Ա.-ն, որոնք միջազգային հետախուզման մեջ են ադամանդների հումքի մաքսանենգության համար»։
ՀՀ ԱԺ «Քաղաքացիական պայմանագիր» խմբակցության պատգամավոր Խաչատուր Սուքիասյանի խոսնակը քիչ առաջ հաղորդագրություն է տարածել, որով տեղեկացրել է, որ Սուքիասյանների ընտանիքը որևէ առնչություն չունի ադամանդի գործարանի հետ:
«Այսօր ռուսական մամուլում հերթական ապատեղեկատվությունն է տարածվել, թե ՌԴ-ում ձերբակալվել է խմբավորում, որը «Ալռոսա»-ից ադամանդներ է գողացել և իբր մատակարարել դրանք ՀՀ ԱԺ պատգամավոր Խաչատուր Սուքիասյանի ընկերությանը։ Տեղեկացնում եմ, որ սա հերթական կեղծ լուրն է, իրականության հետ ոչ մի աղերս չունի, ամբողջությամբ հորինվածք է:
Սա նախորդ ապատեղեկատվության շարունակությունն է, թե իբր Խաչատուր Սուքիասյանը ՀԷՑ-ը գնում է թուրքերին վաճառելու համար: Ձեռագիրը նույնն է, կարծում եմ նմանատիպ լուրեր էլի կլինեն: Կարելի է ասել տեղեկատվական պատերազմ է հայտարարվել : Դարձյալ կրկնում եմ՝ այս լուրը ապատեղեկատվություն է»,- գրել է խոսնակ Աննա Մկրտչյանը։
Թարգմանությունը՝ Էմմա Չոբանյանի
