Սամվել Կարապետյանի փաստաբանական թիմը հայտարարություն է տարածել

Գործարար Սամվել Կարապետյանի փաստաբանական թիմի միջոցով հանդես է եկել հայտարարությամբ, որը ներկայացնում ենք ստորև․

«Ի՞նչ հաջողվեց ներկա իշխանություններին

Իմ նկատմամբ կալանքի որոշում կայացնելու օրը կյանքիս ամենահետաքրքիր օրերից մեկն էր: Ասեմ՝ ինչու. իմ աչքերով տեսա իր իսկ մեղադրանքն ակնհայտ ստիպողաբար առաջադրած քննիչի հուզված վիճակը՝ դատարանի կողմից ինձ կալանավորելու որոշումը հրապարակելուց հետո, փորձառու դատախազի անմխիթար վիճակը՝ ամբողջ դատավարության ընթացքում: Եվ վերջապես, իմ աչքերով տեսա կոտրված դատավորի կեցվածքը, ով դատավարության ընթացքում իբր զարմանքով, տեղ-տեղ արհամարհանքով ունկնդրում էր քննիչի և դատախազի բերած ապօրինի մեղադրանքը ու սնանկ փաստարկները՝ դրանով փորձելով դրսևորել կարծես անկողմնակալ, անկախ վարքագիծ: Այնուհետև չորս ժամ խորհրդակցական սենյակում գտնվելուց հետո ցույց տվեց, որ նա կախյալ է եւ անզոր:

Բայց ոչինչ, շուտով դատարանները անկախ են լինելու։

Պայքարելու ենք»։

Հիշեցնենք, որ «Տաշիր» ընկերությունների խմբի նախագահ, միլիարդատեր Սամվել Կարապետյանը հանդես եկավ հայտարարությամբ, ինչից հետո նա 2 ամսով կալանավորվեց։

Սամվել Կարապետյանը, անդրադառնալով Նիկոլ Փաշինյանի՝ կաթողիկոսին ուղղված կուսակրոնության ուխտը խախտելու մեղադրանքներին, հայտարարել էր, որ աջակցում է եկեղեցուն։ «Մի փոքրիկ խմբակ, մոռանալով հայոց պատմությունը, հայ եկեղեցու հազարավոր տարիների պատմությունը, հարձակվել է հայ եկեղեցու վրա, հայ ժողովրդի վրա։ Քանի որ ես միշտ եղել եմ հայոց եկեղեցու կողքին ու հայ ժողովրդի կողքին՝ ունենալու եմ անմիջական մասնակցություն։ Եթե քաղաքական գործիչներին չհաջողվի, ապա մենք մեր ձևով ենք մասնակցելու այս ամենին», – ասել էր «Տաշիր Գրուպ» ընկերության սեփականատերը։ Թե որն է լինելու մասնակցության ձևը և ում հետ է իրականացնելու ենթադրյալ գործընթացները՝ Կարապետյանը չէր մանրամասնել։ Նրա այս հայտարարությանը վարչապետ Նիկոլ Փաշինյանն արձագանքեց շատ կոշտ գրառմամբ, որին հաջորդեց պաշտոնական մեղադրանք՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչ հնչեցնելու համար։