04.07.2026 | 07:40
ԱԱ-2026. Հայտնի են 1/8 եզրափակիչի բոլոր զույգերը
Պուտինը և Սի Ցզինպինը հեռախոսազրույցում դատապարտել են Իսրայելի գործողությունները
Քաղաքականություն
19.06.2025 | 18:28
ՌԴ նախագահ Վլադիմիր Պուտինը և Չինաստանի նախագահ Սի Ցզինպինը դատապարտել են Իսրայելին Իրանին հարվածելու համար և համաձայնել են, որ անհրաժեշտ է լարվածությունը թուլացնել։ Այս մասին հաղորդագրություն է տարածել Կրեմլը երկու առաջնորդների հեռախոսազրույցից հետո, գրում է Reuters-ը։
Պուտինը և Սին «խստորեն դատապարտում են Իսրայելի գործողությունները, որոնք խախտում են ՄԱԿ-ի կանոնադրությունը և միջազգային իրավունքի այլ նորմեր», այս մասին լրագրողներին ասել է Կրեմլի օգնական Յուրի Ուշակովը։
«Ե՛վ Մոսկվան, և՛ Պեկինը հիմնարար կերպով կարծում են, որ Իրանի միջուկային ծրագրի հետ կապված ներկայիս իրավիճակի և հարցերի ռազմական լուծում չկա։ Այս լուծումը պետք է ձեռք բերվի բացառապես քաղաքական և դիվանագիտական միջոցներով»։
Չինաստանի ղեկավարը հեռախոսազրույցի ժամանակ ասել է, որ տարածաշրջանում «հատուկ ազդեցություն» ունեցող «խոշոր երկրները» պետք է ակտիվացնեն դիվանագիտական ջանքերը՝ իրավիճակը հանդարտեցնելու համար։
«Պատերազմող կողմերը, մասնավորապես Իսրայելը, պետք է հնարավորինս շուտ դադարեցնեն կրակը՝ կանխելու համար լարվածության սրման ցիկլը և վճռականորեն խուսափեն պատերազմի տարածումից», – ասել է Սի Ցզինպինը։
Նա նաև հորդորել է ջանքեր գործադրել քաղաքացիական բնակչությանը պաշտպանելու համար՝ կոչ անելով Իսրայելին և Իրանին նպաստել այլ երկրներից քաղաքացիների տարհանմանը։
Ռուսաստանը կոչ է արել ԱՄՆ-ին չմիանալ Իսրայելի ռմբակոծություններին։ Վերջին օրերին Պուտինը կապի մեջ է եղել ԱՄՆ նախագահ Դոնալդ Թրամփի, Իսրայելի վարչապետ Բենիամին Նեթանյահուի և Իրանի նախագահ Մասուդ Փեզեշքիանի հետ և բազմիցս հայտարարել է, որ Ռուսաստանը պատրաստ է միջնորդել պատերազմող կողմերի միջև։
Մինչ օրս ոչ ոք չի ընդունել Ռուսաստանի առաջարկը։ Հինգշաբթի օրը Պուտինը կրկնել է այդ առաջարկը իր մտերիմ դաշնակից Չինաստանի ղեկավարի հետ հեռախոսազրույցի ժամանակ։
Ուշակովը նշել է, որ Չինաստանի առաջնորդը աջակցություն է հայտնել այդ գաղափարին, «քանի որ կարծում է, որ այն կարող է նպաստել ներկայիս սուր իրավիճակի լիցքաթափմանը»։ Չինաստանի տարածած հաղորդագրության մեջ Սիի կողմից նման աջակցության մասին որևէ հիշատակում չի եղել։
Երկու երկրների ղեկավարները համաձայնել են առաջիկա օրերին սերտ կապի մեջ մնալ։ Պեկինը վաղուց է աջակցում Թեհրանին՝ Մերձավոր Արևելքում իր ռազմավարական և տնտեսական կշիռը խորացնելու ջանքերի շրջանակներում։
Թարգմանությունը՝ Էմմա Չոբանյանի
