05.10.2026 | 23:19
Փաշինյանը նոր նշանակումներ է արել
Կարմիրբերետավորի՝ լրագրողին հարվածելը քննության առարկա է դարձել․ ՔԿ-ն վարույթ է նախաձեռնել
Հասարակություն
17.06.2025 | 18:01
24news.am լրատվական կայքի լրագրող Մերի Մանուկյանի նկատմամբ ակցիայի վայրում կարմիրբերետավորի կողմից բռնություն կիրառելու դեպքով նախաձեռնվել է քրեական վարույթ։ Այս մասին Factor.am-ին հայտնեցին Քննչական կոմիտեից։
«ՀՀ գլխավոր դատախազությունից ստացված նյութերի՝ ԶԼՄ-ներում առերևույթ հանցանքի մասին հրապարակված տեղեկություններն ուսումնասիրելու արդյունքում ՀՀ քննչական կոմիտեում դեպքի առթիվ նախաձեռնվել է քրեական վարույթ՝ Քրեական օրենսգրքի 441-րդ հոդվածի 2-րդ մասի 1-ին կետով»,- ասաց ՔԿ մամուլի խոսնակ Կիմա Ավդալյանը։
Հոդվածը վերաբերում է պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելուն կամ լիազորություններն անցնելուն, որը կատարվել է բռնություն գործադրելով կամ բռնություն գործադրելու սպառնալիքով։
Հիշեցնենք, որ երեկ առավոտյան քասախցիների բողոքի ակցիայի ժամանակ ոստիկանությունը մեծաթիվ ուժեր էր կենտրոնացրել Երևան-Աշտարակ ճանապարհին։ Ոստիկանները բիրտ ուժ կիրառելով բացում էին փողոցի երթևեկելի գոտին՝ բերման ենթարկելով քաղաքացիներին։ Կարմիրբերետավոր Ալեքսանդր Ազարյանը, որ աջուձախ բղավում էր քաղաքացիների վրա, դրանով չբավարարվեց․ նա արմունկով հարված հասցրեց լրագրողին։ Դեպքից հետո ՆԳՆ-ից տեղեկացրին, որ կարմիրբերետավորը հեռացվել է համակարգից։
Արփի Հակոբյան
