Թեհրանում «նշանակալի» հարվածներ են սպասվում, այնտեղ կան միջուկային թիրախներ․ Իսրայելի պաշտպանության նախարար

Կենտրոնական Իսրայելում բալիստիկ հրթիռի անկման վայրում լրագրողների հետ զրույցում երկրի  պաշտպանության նախարար Իսրայել Կացը հայտարարել է, որ ռազմաօդային ուժերը այսօր Թեհրանում կհարվածեն «շատ կարևոր թիրախներին, ռազմավարական թիրախներին, ռեժիմի ենթակառուցվածքների թիրախներին»։ Նա ասել է, որ Իսրայելի պաշտպանության բանակը տարհանման մասին նախազգուշացում կտա մոտակայքում գտնվողներին։

Իրանի միջուկային օբյեկտների վերաբերյալ Կացը հայտարարել է՝ Ֆորդոյի ստորգետնյա օբյեկտը «մի հարց է, որը անպայման կլուծվի»։ Նա ասել է, որ Թեհրանում «կա ավելի քան 10 միջուկային թիրախ», որոնք Իսրայելը «ոչնչացնելու եզրին է»՝ շնորհիվ տարածքում Իսրայելի ռազմաօդային ուժերի օդային գերազանցության։

Իսրայելի ռազմական պաշտոնյան, որը խոսել է անանունության պայմանով, ասել է, որ Իսրայելի ռազմաօդային ուժերը չեն թիրախավորել Իրանի Ֆորդոյի ստորգետնյա միջուկային օբյեկտը, բայց ասում է, որ դա դեռ կարող է տեղի ունենալ, փոխանցում է Reuters-ը։

Պաշտոնյան ասել է, որ Իսրայելը նախազգուշական միջոցներ է ձեռնարկում՝ իր հարվածներով միջուկային աղետի պատճառ դառնալուց խուսափելու համար։ Նա նշել է, որ Իրանը մինչ օրս մոտ 400 բալիստիկ հրթիռ և հարյուրավոր անօդաչու թռչող սարքեր է արձակել Իսրայելի ուղղությամբ՝ թիրախավորելով ինչպես քաղաքացիական, այնպես էլ ռազմական օբյեկտներ։

Գիշերվա ընթացքում արձակված հրթիռների թվի նվազումը ցույց է տալիս, ըստ պաշտոնյայի, որ Իսրայելը հաջողությամբ վնասել է Իրանի հրթիռներ արձակելու կարողությանը։

Թարգմանությունը՝ Էմմա Չոբանյանի