24.08.2026 | 23:26
Ծանրորդ Տիգրան Ավետիսյանը՝ Եվրոպայի Մ15 տարեկանների չեմպիոն
2․3 մլն դոլար՝ 57 էլեկտրամոբիլի համար․ ՆԳՆ-ն թարմացնում է ավտոպարկը
Հասարակություն
17.06.2025 | 15:30
Ներքին գործերի նախարարությունը 57 նոր էլեկտրամոբիլ է ձեռք բերել` յուրաքանչյուրի համար վճարելով 15․2 մլն դրամ կամ մոտ 39․7 հազար դոլար։ Գնման պայմանագիրը կնքվել է օրեր առաջ՝ հունիսի 13-ին, ընդհանուր արժեքը՝ 869․2 մլն դրամ կամ 2․3 մլն դոլար։ Մատակարարը «Մուրան» ընկերությունն է։
Ուշագրավ է, որ թեև նախարարությունը հայտարարել է էլեկտրոնային աճուրդ, «Մուրան»-ը եղել է դրա միակ մասնակիցը։ Ընկերությունը մատակարարելու է Geely մակնիշի (պաշտոնական ներկայացուցիչն է) սեդան ավտոմեքենաներ՝ 2025 թվականի արտադրության, վազքը մեկ լիցքավորմամբ 700 կմ։ Մատակարարման ժամկետը 4 ամիս է, երաշխիքային ժամկետը՝ 3 տարի: Նկատենք, որ պայմանագրի գնի մեջ ներառված չեն մեքենայի վրա սրահի առաջնամասը հետնամասից առանձնացնող, հետնամասի դռների ապակիների ճաղավանդակները, որոնց տեղադրման համար հավելյալ ֆինանսական միջոցներ անհրաժեշտ կլինեն։
«Մուրան» ՍՊԸ-ն պատկանում է Կարեն և Աշոտ Շախմուրադյան եղբայրներին և նրանց մորը՝ Լյուսյա Տեր-Սարգսյանին։ Կարեն Շախմուրադյանը 2016 թ-ին Ազգային ժողովի պատգմավոր էր դարձել ՀՅԴ համամասնական ցուցակով: Շախմուրադյաններին են պատկանում նաև «Մեգնա» և «Կարկոմավտո» ընկերությունները, որոնցից ևս ՆԳՆ-ն այս տարի վերանորոգման ծառայություններ է գնել։
ՆԳՆ-ն, հիշեցնենք, էլեկտրամոբիլներ էր գնել նաև «ԱՎԱՆՏԳԱՐԴ» ՍՊԸ-ից («Volvo» մակնիշի)` 2025-ին 15 հատ 311 մլն դրամով, 2024-ին` 67 հատ 1․3 մլրդ դրամով:
Գայանե Խաչատրյան
