Իրանից Հայաստան եկողներ կան, ընդհանուր տագնապ կա․ Զարեհ Սինանյան․ ՏԵՍԱՆՅՈՒԹ

«Իրանից Հայաստան եկողներ կան, բայց դեռ մեծ հոսք չկա»,- Factor.am-ի հետ զրույցում հայտնեց ՀՀ վարչապետի աշխատակազմի սփյուռքի գործերի գլխավոր հանձնակատար Զարեհ Սինանյանը։

«Ընդհանուր տագնապ և անհանգստություն կա, մարդիկ փորձում են Թեհրանից և խոշոր քաղաքաներից որքան հնարավոր է հեռու լինել։ Հայաստան տեղափոխվելու խնդիր այս պահին չկա», – շեշտեց գլխավոր հանձնակատարը։

Սինանյանի խոսքով՝ իրավիճակն, այդուհանդերձ, անկանխատեսելի է․ գրասենյակի աշխատակիցները կապի մեջ են իրանահայերի հետ։

«Երեկ շատ էին անհանգստացել, երբ Նեթանյահուն հայտարարել էր, որ ինքն էլ է սկսելու քաղաքացիական անձանց և կառույցներ թիրախավորել։ Նման արտահայտություն էր արել, որի արդյունքում մարդկանց մոտ տագնապը ավելի էր շատացել։ Գիտենք մարդկանց, որոնք մեքենա են նստել և դեպի Հայաստան են ճանապարհվել»,- հայտնեց Սինանյանը։

Ըստ հանձնակատարի՝ Իրանից Հայաստան են գալիս այն իրանահայերը, որոնք այստեղ տուն և հարազատներ ունեն։ Հարցին, թե տարհանման դեպքում արդյոք Հայաստանը պատրաստ է իրանահայերի մեծ հոսք ընդունել՝ Սինանյանն արձագանքեց․ «Հաշվի առնելով 2023-ի սեպտեմբերի փորձը, երբ ունեինք Արցախից շատ ավելի մեծ ներհոսք, կարծում եմ, որ գոնե սկզբնական փուլում Հայաստանը պատրաստ կլինի ընդունել նաև իրանահայերին»,- նշեց Սփյուռքի գործերի գլխավոր հանձնակատարը։

Հիշեցնենք, որ Իսրայելը հունիսի 13-ի վաղ առավոտից հարվածներ էր հասցրել Իրանի տարածքին՝ թիրախավորելով Իրանի ռազմական և միջուկային օբյեկտները։ Ավելի ուշ Իրանը պատասխանել էր՝ Իսրայելի ուղղությամբ հրթիռային հարվածների ալիքներ հասցնելով։ Կողմերը շարունակում են փոխադարձ հարվածներ հասցնել։

Մանրամասները՝ տեսանյութում։

Անի Թամրազյան