Քննարկվել է Իրանից Հայաստանի տարածքով հնդիկ ուսանողների տարհանման հնարավորությունը․ ԱԳՆ

Հայաստանի և Հնդկաստանի ԱԳ նախարարները քննարկել են Իրանից Հայաստանի տարածքով հնդիկ ուսանողների տարհանման հնարավորությունը: Տեղեկությունը Factor.am-ին հայտնել է ՀՀ ԱԳՆ մամուլի քարտուղար Անի Բադալյանը։

Նրա խոսքով՝ ՀՀ կողմից ցուցաբերվել է համապատասխան աջակցություն:

Իսրայելի և Իրանի միջև լարվածության սրման հետևանքով Հնդկաստանը դեռ երեկ հայտարարել էր իր քաղաքացիների տարհանումը կազմակերպելու մտադրության մասին։ Տարհանման հնարավոր ուղիների ցանկում է Հայաստանը։ 

Ավելի վաղ The Indian Express-ը նշել է, որ ըստ պաշտոնյաների՝ Հնդկաստանի արտգործնախարար Սուբրամանյամ Ջայշանկարը խոսել է Հայաստանի իր պաշտոնակից Արարատ Միրզոյանի հետ՝ քննարկելու լոգիստիկ և դիվանագիտական համակարգումը։ 

2022 թվականի տվյալներով՝ Իրանում բնակվում է Հնդկաստանի շուրջ 10 000 քաղաքացի, այդ թվում՝ 2000 ուսանող։

Իսրայելի և Իրանի միջև փոխադարձ հարվածները շարունակվում են արդեն հինգերորդ օրը։ Իրանի իշխանությունները հայտնել են իսրայելական հարվածներից 224 զոհի մասին, որոնց մեծ մասը քաղաքացիական անձինք են։ Իսրայելը հայտնել է իրանական պատասխան հարվածներից 24 զոհի մասին։ Հունիսի 13-ից Իրանը ժամանակավորապես փակել է իր օդային տարածքը Իսրայելի հետ փոխադարձ հարվածների ֆոնին, ինչը մտահոգություններ է առաջացրել օտարերկրացիների անվտանգության առնչությամբ։ 

Այսօր ԱՄՆ նախագահ Դոնալդ Թրամփն էլ սոցիալական մեդիայում կոչ է արել Թեհրանի բնակիչներին անմիջապես լքել քաղաքը։