Սերժ Սարգսյանի գործով դատական նիստը՝ ՈՒՂԻՂ

Հակակոռուպցիոն դատարանում՝ նախագահությամբ դատավոր Արամ Գրիգորյանի, այսօր սկսվեց Հայաստանի երրորդ նախագահ Սերժ Սարգսյանի գործի քննությունը:

Ըստ գործի՝ Սերժ Սարգսյանը 2007 թվականի հունիսի 7-ից մինչև 2008 թվականի ապրիլի 8-ը զբաղեցնելով ՀՀ վարչապետի պաշտոնը, ղեկավարելով կառավարության գործունեությունը, համակարգելով նախարարների ու նրան ենթակա պետական կառավարման այլ մարմինների ղեկավարների աշխատանքը և կրելով ՀՀ Սահմանադրությանը հետևելու, կառավարության բնականոն գործունեությունն ապահովելու պարտականություններ, ինչպես նաև օժտված լինելով մշտապես իշխանության ներկայացուցչի գործառույթներ իրականացնող պաշտոնատար անձի լիազորություններով, իր պաշտոնեական դիրքն օգտագործելով, այլ անձանց հետ հանցակցությամբ, «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի oգտին գործողություններ կատարելուն նպաստելու Սամվել Մայրապետյանի և դստեր ամուսնու՝ Միքայել Մինասյանի օժանդակությամբ ստացել է առանձնապես խոշոր չափերով` 924.950.000 ՀՀ դրամին համարժեք 2.985.000 ԱՄՆ դոլար կաշառք: Մասնավորապես՝ ըստ քրեական գործի Սարգսյանը ենթադրյալ կաշառքը ստացել է «Թի Էս Էս Սի Արմենիա» ՍՊ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար՝ 2008 թվականի փետրվարին և ապրիլին։ Սարգսյանը մեղադրանքը չի ընդունում։

Նշենք, որ Համբարձումյանից ենթադրյալ կաշառք ստանալու գործով անցնում են նաև Հայաստանի երկրորդ նախագահ Ռոբերտ Քոչարյանն ու նախկին փոխվարչապետ Արմեն Գևորգյանը։ Նրանց վերաբերյալ գործը, սակայն, ավելի, քան 6 տարի առաջ է դատարան ուղարկել։ Ըստ Համբարձումյանի ցուցմունքի՝ նա Արմեն Գևորգյանին 1 մլն, Քոչարյանին և Սարգսյանին՝ 3 մլն ԱՄՆ դոլալ կաշառք է տվել։ Փաստացի՝ այժմ Սարգսյանին վերագրվում է ոչ թե 3, այլ 2 մլն 985 հզ դոլար կաշառք ստանալու գումար։ Ստացվում է՝ իրավապահները Քոչարյանի և Գևորգյանի դրվագը դեռևս տարիների առաջ են ուղարկել դատարան, իսկ Սերժ Սարգսյանի դրվագը՝ միայն 6 տարի անց։

Արաքս Մամուլյան