Քաղաքականություն
17.06.2025 | 12:18
G7-ի՝ Մեծ յոթնակի երկրների առաջնորդները (գագաթնաժողովն ընթանում է Կանադայում) հայտարարություն են տարածել Իսրայելի և Իրանի միջև վերջին զարգացումների վերաբերյալ։ Նրանք, մասնավորապես, վերահաստատում են Մերձավոր Արևելքում խաղաղության և կայունության շուրջ իրենց հանձնառությունը։
«Այս համատեքստում մենք հաստատում ենք, որ Իսրայելն իրավունք ունի ինքնապաշտպանության։ Մենք վերահաստատում ենք մեր աջակցությունը Իսրայելի անվտանգությանը։ Մենք նաև հաստատում ենք քաղաքացիական բնակչության պաշտպանության կարևորությունը։ Իրանը տարածաշրջանային անկայունության և ահաբեկչության հիմնական աղբյուրն է։ Մենք մշտապես հստակորեն նշել ենք, որ Իրանը երբեք չի կարող միջուկային զենք ունենալ»,- ասվում է հայտարարության մեջ։
G7-ի առաջնորդները կոչ են անում իրանական ճգնաժամի լուծման, որը կարող է բերել Մերձավոր Արևելքում ռազմական գործողությունների ավելի լայն ապաէսկալանացման, այդ թվում՝ Գազայում հրադադարի։
«Մենք զգոն կմնանք միջազգային էներգետիկ շուկաների վրա հետևանքների նկատմամբ և պատրաստ կլինենք համակարգել մեր ջանքերը, այդ թվում՝ համախոհ գործընկերների հետ, շուկայի կայունությունը պաշտպանելու համար»,-ասվում է հայտարարության մեջ։
Ավելի վաղ հաղորդվել էր, որ ԱՄՆ նախագահ Դոնալդ Թրամփը հունիսի 16-ին որոշել է շտապ ընդհատել իր մասնակցությունը G7-ի գագաթնաժողովին։
Հիշեցնենք, որ Իսրայելը հունիսի 13-ին հարձակում է սկսել Իրանի վրա՝ թիրախավորելով միջուկային օբյեկտները, ռազմական և էներգետիկ ենթակառուցվածքները: Հարվածների հետևանքով զոհվել են բարձրաստիճան զինվորականներ, միջուկային ոլորտի գիտնականներ և խաղաղ բնակիչներ։ Իրանն էլ ի պատասխան հարվածներ է հասցնում Իսրայելի տարածքին:
Թարգմանությունը՝ Էմմա Չոբանյանի
