15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Ստամբուլի ընդդիմադիր բանտարկված քաղաքապետին սպառնում է 7 տարի 4 ամիս ժամկետով ազատազրկում
Քաղաքականություն
16.06.2025 | 20:19
Այսօր տեղի է ունեցել Ստամբուլի ընդդիմադիր քաղաքապետ Էքրեմ Իմամօղլուի դեմ հարուցված գործով երկրորդ դատական նիստը՝ Ստամբուլի գլխավոր դատախազ Աքըն Գյուրլեքի և նրա ընտանիքի դեմ նրա արած հայտարարությունների պատճառով, գրում է TRT Haber-ը։
Իմամօղլուն ներկա է եղել դատական նիստին, որի ընթացքում նրան մեղադրել են «ահաբեկչության դեմ պայքարին մասնակցած անձանց թիրախավորելու», «պետական պաշտոնյային հրապարակայնորեն վիրավորելու» և «սպառնալու» մեջ։ Դատարանում արված հայտարարության մեջ Իմամօղլուն կտրականապես հերքել է մեղադրանքները՝ գործը որակելով քաղաքական և իրեն ընտրական հաջողության համար պատժելու ավելի լայն ջանքերի մաս։
«Այսօր ես չեմ դատվում այստեղ։ Իրականում հետապնդվում է կառավարությանը, ժողովրդավարական յուրաքանչյուր նվաճման և ժողովրդի կամքին դուր չեկող յուրաքանչյուր այլախոհ դիրքորոշում»,- ասել է նա։
Իմամօղլուի փաստաբանները ժամանակ են խնդրել՝ պաշտպանությունը կառուցելու համար։ Գործը հետաձգվել է մինչև հուլիսի 16-ը։
Իմամօղլուին սպառնում է մինչև 7 տարի 4 ամիս ժամկետով ազատազրկում 3 հանցագործությունների համար, ինչպես նաև քաղաքական գործունեությամբ զբաղվելու արգելք։ Ստամբուլի գլխավոր դատախազության ահաբեկչական հանցագործությունների քննչական բյուրոյի կողմից կազմված մեղադրական եզրակացության մեջ գլխավոր դատախազ Աքըն Գյուրլեքը ներառված է որպես «տուժող»։ Մեղադրական եզրակացության մեջ նշվում է, որ հետաքննությունը սկսվել է ի պաշտոնե՝ պարզելով, որ Իմամօղլուի կողմից գլխավոր դատախազ Գյուրլեքի դեմ իր ելույթի ժամանակ արված հայտարարություններում քրեական բովանդակություն կա։
Իմամօղլուն և գլխավոր ընդդիմադիր Ժողովրդահանրապետական կուսակցությունը Գյուրլեքին մեղադրում են իր դատական լիազորություններն օգտագործելու համար՝ նախագահ Ռեջեփ Թայիփ Էրդողանի ու նրա ղեկավարած «Արդարություն և զարգացում» կուսակցության (ԱԶԿ) կառավարության հրամանով ընդդիմադիր կուսակցությունը թիրախավորելու համար։
Իմամօղլուն բազմաթիվ հետաքննությունների է ենթարկվում և 2022 թվականի դեկտեմբերին դատապարտվել է ավելի քան երկու տարվա ազատազրկման, նրան արգելվել է զբաղվել քաղաքականությամբ՝ Թուրքիայի Բարձրագույն ընտրական խորհրդի (YSK) անդամներին վիրավորելու մեղադրանքով։ Քաղաքապետը բողոքարկել է դատավճիռը։
Գյուրլեքին ուղղված նրա քննադատության վերաբերյալ դատավարության արդյունքը կարող է էականորեն ազդել Իմամօղլուի քաղաքական ապագայի վրա, քանի որ դատապարտումը և քաղաքական արգելքը նրան կհեռացնեն քաղաքականությունից։
Հիշեցնենք, որ Իմամօղլուն մարտին ձերբակալվել, ապա կալանավորվել է կոռուպցիոն և այլ մեղադրանքներով։
Թարգմանությունը՝ Էմմա Չոբանյանի
