Դեռ վերցրած պարտքերը չենք էլ տվել, բայց արդեն տանիք չունենք. տուժած բնակիչ․ ՏԵՍԱՆՅՈՒԹ

«Քամին պատուհան էր բացում, չէի կարողանում պահել, չգիտեի որ այսպիսի ավերածություններ է արել, երբ ամեն ինչ անցավ, դուր եկանք ու տեսանք որ էլ ոչինչ չունենք», – ասում է Ապարանում պտտահողմից տուժած բնակիչը։

Նրա խոսքով՝ մեկ տարի էլ չկար, ինչ տանիքը կառուցել էին։ «500 հազարի մենակ տախտակներն ենք առել, 300 հազար թիթեղին ենք տվել, 700 հազար վարպետի գումար ենք տվել, էլ չեմ հաշվում մնացած ծախսերը։ Սարսափելի է, մի տարի էլ չկա, դեռ չենք էլ վերջացրել այդ պարտքերը, բայց այս վիճակն է»,- ասում է աղետից տուժած բնակիչը։

Ներքին գործերի նախարարությունից հայտնել են, որ հունիսի 16-ի ժամը 09։00-ի դրությամբ Ապարանում վնասվել է 20 բազմաբնակարան շենքի, 86 առանձնատան, 3 դպրոցի, 1 մշակույթի տան, իրավապահ կառույցների 2 տարածքային ստորաբաժանման ու 24 կազմակերպության վարչական շենքերի տանիքներ։ Բացի այդ, վնասվել է 70 էլեկտրասյուն, 30 տրանսպորտային միջոց, 2 խաղահրապարակ։ Տապալվել է 100-ից ավել ծառ:

Ապարանի ավերիչ պտտահողմից հետո այսօր քաղաքում վնասների գնահատման ու վերականգնման աշխատանքներ էին տարվում։ Factor TV-ն շրջել է քաղաքում և արձանագրել, որ բազմաթիվ բնակիչների տներում կոտրվել են պատուհանները, վնասվել են պատերն ու արտաքին հարդարանքը: Տուժել են նաև հանրային նշանակության շենքեր, դպրոցներ, հանրային սննդի կետեր, պոկվել են ծառեր և սյուներ։ Քաղաքում այսօր գազամատակարարումը վերականգնվել է, սակայն դեռ չկա էլեկտրականություն։ Ապարանում պտտահողմի հետևանքով 4 անձ մարմնական վնասվածքներ է ստացել, նրանցից մեկն անչափահաս է։

Մանրամասները՝ տեսանյութում։

Անի Թամրազյան