Իսրայելի ագրեսիան ԱՄՆ-ի ուղղակի աջակցության արդյունքն է․ Արաղչին՝ Կայա Կալլասին

ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասի հետ հեռախոսազրույցի ժամանակ Իրանի ԱԳ նախարարը Իսրայելի ագրեսիան համարել է ԱՄՆ-ի ուղղակի աջակցության արդյունք․ գրում է Mehr գործակալությունը։

Արաղչին նաև ասել է, որ «Իրանը վճռական պատասխան է տվել Իսրայելի ագրեսիային՝ իր ազգային ինքնիշխանությունը, ժողովրդին և անվտանգությունը պաշտպանելու համար, և վճռական է օգտագործելու իր օրինական իրավունքը՝ հակազդեցություններ ձեռնարկելու»։

Նա կոչ է արել Եվրամիությանը և Անվտանգության խորհրդի մշտական ​​անդամներին պատասխանատու դիրքորոշում ցուցաբերել Իսրայելի ագրեսիան դատապարտելու և ագրեսորին պատասխանատվության ենթարկելու հարցում։

ԵՄ արտաքին քաղաքականության ղեկավարը, իր հերթին, խորը ափսոսանք և մտահոգություն հայտնել տարածաշրջանում լարվածության սրման կապակցությամբ՝ ընդգծելով ԵՄ-ի պատրաստակամությունը աջակցելու Անվտանգության խորհրդում և այլ միջազգային մարմիններում դիվանագիտական ​​ջանքերին՝ տարածաշրջանում լարվածության նվազեցմանը և խաղաղության ու անվտանգության վերականգնմանը նպաստելու համար։

Հիշեցնենք, որ Իսրայելը հունիսի 13-ի վաղ առավոտյան հարձակվել է Իրանի վրա։ Հարվածների ժամանակ նահատակվել են Իրանի զինված ուժերի շտաբի պետ, գեներալ-մայոր Մոհամմադ Հոսեյն Բաքերին, Իսլամական հեղափոխության պահապանների կորպուսի հրամանատար, գեներալ-մայոր Հոսեյն Սալամին, Իրանի «Խաթամ ​​ալ-Անբիա» կենտրոնական շտաբի հրամանատար, գեներալ-մայոր Ղոլամ Ալի Ռաշիդը, ԻՀՊԿ-ի ավիատիեզերական ուժերի հրամանատար, գեներալ-մայոր Ամիր Ալի Հաջիզադեն և առնվազն վեց իրանցի միջուկային գիտնականներ։ Մահացել է Իրանի 78 քաղաքացի, վիրավորվել 320-ը։

Իրանն ի պատասխան հրթիռային երեք հարձակում է գործել Իսրայելի վրա։ Իսրայելը հայտնել է 4 զոհի և 70-ից ավելի վիրավորների մասին, ինչպես նաև Թել Ավիվում ու Ռամաթ Գանում ավերածությունների ու շինությունների փլուզումների մասին։ Նշվում է, որ փլատակների տակ մարդիկ կան։

Թարգմանությունը՝ Անահիտ Խաչատրյանի