Քաղաքականություն
13.06.2025 | 20:21
Իսրայելի կողմից հասցված հարվածներից ծանր վնաս է կրել Նաթանզում գտնվող Իրանի ուրանի հարստացման գլխավոր կենտրոնը։ Այս մասին հայտարարել է Իսրայելի բանակի մամուլի խոսնակ, բրիգադի գեներալ Էֆի Դեֆրինը, գրում է BBC-ի ռուսական ծառայությունը։
Նա նաև հավելել է, որ Իսրայելը գործում է աստիճանական հարձակման ծրագրի շրջանակում, և գործողությունը կարող է երկարաձգվել՝ ակնարկելով հետագա նոր հարձակումների մասին։
«Այս օբյեկտը Իսլամական հեղափոխության պահապանների կորպուսն օգտագործել է իր ռազմական միջուկային ծրագիրն առաջ մղելու համար։ Տարիներ շարունակ իրանական ռեժիմի ներկայացուցիչները փորձել են միջուկային զենք ձեռք բերել այս օբյեկտում»,- Դեֆրինի խոսքերն է մեջբերում Reuters-ը։
Նրա խոսքով՝ այն օբյեկտը, որին հարվածել է իսրայելական բանակը, «ունի անհրաժեշտ ենթակառուցվածքներ՝ ուրանը ռազմական նպատակներով պիտանի մակարդակի հարստացնելու համար»։
Ավելի վաղ Իսրայելի բանակը հայտարարել էր, որ հարվածել է Նաթանզի միջուկային օբյեկտին։ Բանակի տվյալներով՝ հարվածը վնասել է օբյեկտի ստորգետնյա հատվածը, ինչպես նաև կարևորագույն ենթակառուցվածքները, որոնք ապահովում են օբյեկտի անխափան գործունեությունը։
Իրանի Ատոմային էներգիայի կազմակերպությունը հայտարարել է, որ Նաթանզի ստորգետնյա ուրանի հարստացման օբյեկտին Իսրայելի կողմից հասցված ավիահարվածների մեծ մասը գետնի մակարդակով է։
«Վնասի մեծ մասը մակերեսային մակարդակում է»,- ասել է կազմակերպության խոսնակ Բեհրուզ Ղամալվանդին՝ հավելելով, որ հարստացման ցենտրիֆուգների ստորգետնյա տեղադրման վայրում տուժածներ չկան։
Թարգմանությունը՝ Էմմա Չոբանյանի
